२३ जेठ २०८३, शनिबार
नेकपा माओवादी केन्द्रले गठबन्धन जोगाउन अन्तिम पहल गर्ने निर्णय गरेको छ ।
अमेरिकी आर्थिक सहयोग कार्यक्रम मिलेनियम च्यालेन्ज कम्प्याक्ट (एमसीसी)को विपक्षमा मतदान गर्ने निर्णय यथावत राख्दै गठबन्धन जोगाउन लाग्ने निर्णय भएको नेता गिरिराजमणि पोखरेलले जानकारी दिए ।
अध्यक्ष पुष्पकमल दाहाल प्रचण्डको निवास खुमलटारमा शुक्रवार बिहान बसेको माओवादीका पूर्व स्थायी कमिटी सदस्यहरूको बैठकले एमसीसी असफल बनाउँदै गठबन्धन कायम राख्न पहल गर्ने निर्णय गरेको हो ।
‘एमसीसीको विपक्षमा मतदान गर्ने पूर्ववत् निर्णय यथावत राख्दै, राष्ट्रिय सहमति गर्नका लागि अझै पनि कुनै सम्भावना छ भने कोशिश गर्ने निर्णय भएको छ,’ पोखरेलले लोकान्तरसँग भने ।
माओवादी बैठकमा कांग्रेस र एमालेबीच पछिल्लो चरणमा शुरू भएको संवादबारे समेत छलफल भएको थियो ।
पोखरेलले माओवादीले सरकार छाड्ने नछाड्ने कुरा गौण भएको बताए । ‘शेरबहादुर देउवाको निगाहामा माओवादी सरकारमा गएको होइन, पहिलो प्रतिनिधि सभा विघटनको विरोध गर्ने आँट समेत नगरेका देउवालाई हामीले प्रधानमन्त्री बनाएको हो,’ पोखरेलले भने, ‘एमसीसी भोटिङमा गएपछि हामी आ–आफ्नो बाटो लाग्ने भनेर प्रचण्डले देउवालाई भनिसक्नु भएको छ ।’
पोखरेलले नेपालमा शक्ति राष्ट्रको टकराव हुन नदिन आफूहरू एमसीसीको विपक्षमा उभिएको बताए ।
