०३ साउन २०८३, आइतबार
नेपाली कांग्रेसका महामन्त्री गगन थापाले मंसिर अगावै संसदीय चुनाव हुन सक्ने बताएका छन् ।
संसदको प्रमुख प्रतिपक्ष दल नेकपा एमालेले निरन्तर संसद अवरोध गरिरहेकाले चाँडै निर्वाचनमा जानुपर्ने अवस्था आउन सक्ने थापाले बताएका हुन् ।
कांग्रेस निकट नेपाल निजामती कर्मचारी युनियनको अधिवेशनलाई काठमाडौंमा सम्बोधन गर्दै थापाले एमालेले संसदको उपहास गरिरह्यो भने त्यसको विकल्पमा निर्वाचनमा जानुपर्ने हुन सक्ने बताए ।
‘स्थानीय तहको चुनाव वैशाख ३० मै हुन्छ तर, संसदीय चुनाव कहिले हुन्छ मलाई थाहा छैन,’ उनले भने, ‘एमालेले संसदको उपहास गरिरहने र हामीले बोलाएको छलफलमा उहाँहरू नआउने हो भने त्यसबेला किन संसद् चलाइरहने भन्ने प्रश्न उठ्छ ।’
सत्तारूढ गठबन्धनभित्र पनि संसद् विघटन गरेर निर्वाचनमा जाने विकल्पबारे छलफल हुन थालेको छ । एमालेले संसद चल्न नदिएको कारण चुनावमा जानुपर्ने बारे नेताहरूले छलफल शुरू गरेका छन् ।
२०७४ को निर्वाचनमा कांग्रेसले हारेको भए पनि कांग्रेस राजनीतिक स्थिरताको पक्षमा भएकाले प्रतिपक्षमा बसेर भूमिका खेलिरहेको अवस्थामा एकाएक सरकारको जिम्मेवारी आइलागेको उनले बताए ।
अब कांग्रेसले सबै तहको निर्वाचन गराउने र चुनाव जितेर आगामी पाँच वर्ष सानदार ढंगले सरकारले चलाउने पनि थापाले बताए ।
कम्युनिष्ट पार्टीहरूले आफ्नो घरमा आफैंले आगो लगाएर खरानी घसेको उनले बताए ।
‘आगामी निर्वाचन कम्युनिष्ट पार्टीले नै गराउनुपथ्र्यो तर, उनीहरूले आफ्नो घरमा आफैंले आगो लगाए,’ थापाले भने, ‘एकथरी देखाइदिन्छौं भन्दै खरानी घसेर निस्किए, अर्काथरी खरानीको थुप्रोमै अट्टाहास गर्दै बसे ।’
