०९ असार २०८३, मंगलबार
यस वर्ष रौतहटमा उखु उत्पादन आधा नै घटेको छ ।
उखुको रकम भुक्तानीमा ढिलाइ र चिनी मिल नै बन्द भएपछि यहाँका किसानले उखु खेती छोडेपछि उत्पादन घटेको हो ।
रौतहटको मध्यभागमा रहेको श्रीराम सुगर मिल्स गत वर्षदेखि बन्द छ ।
अर्को कटहरिया नगरपालिकामा रहेको बाबा बैजुनाथ चिनी मिल भने गत वर्षदेखि नै सञ्चालनमा छ तर उखु उत्पादन घटेको कारण मिलको लक्ष्य पूरा हुन सकेको छैन ।
२० लाख क्विन्टल उखु क्रसिङ गर्ने लक्ष्य लिएको बैजुनाथ चिनी मिलले यस वर्ष छ लाख क्विन्टलको हाराहारीमा क्रसिङ गरेको मिलका सञ्चालक बैजुबाबराले बताए ।
उखु अभावका कारण मिल सिजन अवधिभर नचलेपछि लक्ष्य पूरा हुन नसक्दा घाटा बेहोर्नुपरेको उनको गुनासो छ ।
जिल्लामा बर्सेनि ११/१२ हजार बिघामा उखु उत्पादन हुँदै आएको जानकारी दिँदै उखु उत्पादक सङ्घ रौतहटका सचिव सफिन्द्र यादवले यस वर्ष पाँच/छ हजार बिघामा मात्र उखु खेती भएको बताए। गोरखापत्र दैनिकमा यादवराज पुरीले खबर लेखेका छन् ।
