०२ असार २०८३, मंगलबार
सञ्चालनमा नरहेका वायुसेवा प्रदायक कम्पनीलाई बक्यौता रकम बुझाउन नेपाल नागरिक उड्डयन प्राधिकरणले फेरि ताकेता गरेको छ ।
प्राधिकरणले चौथो पटक आइतबार सार्वजनिक सूचना जारी गर्दै बक्यौता रकम बुझाउन निर्देशन दिएको हो ।
यसअघि २०७६ असोज ७ गते पहिलो पटक बक्यौता बुझाउन ती सेवा प्रदायकलाई प्राधिकरणले सार्वजनिक गरेको थियो ।
त्यसपछि २०७७ माघ २६ गते र २०७८ भदौ १२ गतेसमेत बक्यौताका लागि प्राधिकरणले ताकेता गरेको थियो ।
यद्यपि तोकिएको समयभित्र पनि बक्यौता नबुझाएपछि प्राधिकरणले आइतबार पनि सार्वजनिक सूचना जारी गरेको हो ।
प्राधिकरणका अनुसार सञ्चालनमा नरहेका विभिन्न सातवटा सेवा प्रदायकले नौ करोड १६ लाख ९९ हजार १७६ रुपियाँ बक्यौता बुझाउन बाँकी छ जसमध्ये नेकोन एयरले सबैभन्दा धेरै चार करोड ७२ लाख २५ हजार ३४३ रुपियाँ बक्यौता बुझाउनुपर्ने प्राधिकरणको तथ्याङ्क छ ।
त्यसपछि कस्मिक एयरको तीन करोड ४७ लाख ५८ हजार ७० रुपियाँ बक्यौता छ भने शिवानी एयरले ५५ लाख ५१ हजार ५३, गोरखा एयरले २० लाख ३५ हजार २९, माउन्टेन एयरले छ लाख १० हजार ८३४, स्काइलाइन एयरवेजले सात लाख ८० हजार ४०० र एयर काष्ठमण्डपले सात लाख ३८ हजार ४४७ रुपियाँ बक्यौता बुझाउन बाँकी रहेको प्राधिकरणले जनाएको छ ।
प्राधिकरणले बक्यौता बाँकी रहेका सबै वायुसेवा प्रदायकलाई सात दिनभित्र प्राधिकरणको बैङ्क खातामा रकम मौज्दात गर्न र त्यसरी बुझाएको सक्कल भौचर प्राधिकरणको कार्यालयमा बुझाउन निर्देशन दिएको छ । गोरखापत्र दैनिकमा खबर छ ।
