०९ साउन २०८३, शनिबार
प्रतिकूल मौसमका कारण कम भिजिबिलिटी हुँदा सोमवार काठमाडौंबाट हुने उडान प्रभावित भएका छन् ।
कम भिजिबिलिटी हुँदा आँखाले हेरेर गरिने (भीएफआर) उडान नभएको र प्रविधिको सहायताले मात्रै हुने (आईएफआर) उडान मात्रै भएको हुँदा आन्तरिक उडान केही प्रभावित हुन पुगेको त्रिभुवन अन्तर्राष्ट्रिय विमानस्थल कार्यालयले जनाएको छ ।
विमानस्थलका अनुसार उडान ढिलो भए पनि रद्द नभएको र केही समय पर्खंदै उडान गर्नुपर्ने हुँदा विमानस्थलमा यात्रुको भीड बढ्ने गर्छ । उडान ढिलो हुँदा पहिलो उडानका यात्रु नउड्दै दोस्रो र तेस्रो उडानका यात्रु विमानस्थल पुगिसक्ने भएकाले पनि भीडभाड बढ्ने गरेको विमानस्थल कार्यालयले जनाएको छ ।
विमानस्थल कार्यालयका अनुसार रात्री उडान हुने विमानस्थलमा ९ बजेसम्म भए पनि उडान हुन्छ । सकेसम्म उडान रद्द नगरी यात्रुलाई गन्तव्यसम्म पुर्याउने काम विमानस्थल र वायुसेवा कम्पनीले गरिरहेका छन् ।
आन्तरिक विमानस्थलबाट हुने अधिकांश उडान भीएफआरबाट हुने गर्छ । कम भिजिबिलिटी हुँदा सबै उडान आईएफआरबाट गर्नुपर्ने हुँदा निर्धारित समयभन्दा केही ढिलो हुन्छ । आन्तरिक विमानस्थलबाट हुने उडान अवतरण दैनिक २०० भन्दा बढी छन् । मौसम खराब हुनासाथ भिजिबिलिटी नपुगेर ढिलो हुँदै जाँदा व्यवस्थापन मिलाउन गाह्रो हुने भएकाले पनि यात्रुको भीड बढ्ने गरेको छ ।
सोमवार १५२ वटा उडान राखेको बुद्ध एयरको काठमाडौंबाट तुम्लिङटार जाने २ उडान रद्द भएको छ । बाँकी सबै उडान ढिलो हुँदै सञ्चालन भइरहेको र साँझ ९ बजेसम्म पनि उडान हुने बुद्ध एयरका सञ्चार संयोजक दीपेन्द्र कर्णले बताए ।
उनका अनुसार भिजिबिलिटी नपुगेर र बिहानै गइसक्नुपर्ने उडान प्रभावित हुँदा त्यसको असर अरु उडानमा पनि पर्ने गरेको छ ।
विमानस्थल आइपुगेका यात्रुलाई सकेसम्म गन्तव्यमा पुर्याउनुपर्ने भएकाले पनि ढिलो गरेर भए पनि उडान रद्द नगरी सेवा दिइने कर्णले बताए ।
कर्णका अनुसार छिट्टै उडान गर्नुपर्ने पोखरा, चितवन, सुर्खेत, तुम्लिङटारबाहेक अन्य शहरी क्षेत्रका आन्तरिक विमानस्थलमा यात्रु उडान जारी रहेका छन् ।
