०९ असार २०८३, मंगलबार
नेकपा एमालेका अध्यक्ष केपी शर्मा ओलीले प्रथम शहीदका विषयमा दिएको अभिव्यक्तिलाई लिएर मगर संघ रुपन्देहीले आपत्ति जनाएको छ ।
अध्यक्ष ओलीले गत हप्ता काठमाडौंमा नेपालका प्रथम शहीद लखन थापा मगर नभई अछामका बलदेव शाही उर्फ बाँकावीर हुन् भन्ने अभिव्यक्ति दिएका थिए ।
मगर संघ जिल्ला समिति रुपन्देहीले भनाइको घोर भत्र्सनासहित विरोध जनाएको छ ।
नेपाल मगर संघका केन्द्रीय उपाध्यक्ष दलबहादुर वीरकट्टा मगरले ओलीले सार्वजनिक रूपमा तत्काल भनाइ फिर्ता लिनुपर्ने माग गरे । ओलीले अभिव्यक्ति फिर्ता नलिए देशैभरका मगरहरू मगर संघको आह्वानमा सशक्त रूपमा आन्दोलनमा उत्रिने चेतावनी दिए ।
‘विक्रम संवत् २०५६ सालमा शहीद र विक्रम संवत् २०७२ असोज २ गतेको मन्त्रिपरिषद्को निर्णयले प्रथम शहीद घोषणा गरिसकेको अवस्थामा प्रथम शहीद होइन भन्नु गैरजिम्मेवार, असंवैधानिक र साम्प्रदायिकताबाट प्रेरित छ,’ वीरकट्टाले भने ।
मगर संघ जिल्ला समिति रुपन्देहीका जिल्ला अध्यक्ष आनबहादुर सोतीमगर, सचिव थर्कबहादुर बारघरे मगरले ओलीको अभिव्यक्ति संविधानप्रदत राज्यले गरेको निर्णयप्रतिको ठाडो चुनौती र बर्खिलाप भएको धारणा व्यक्त गरे ।
