लोकान्तर डटकमको नियमित प्रस्तुती ‘लोकान्तर राउण्ड अप’मा पाठकवृन्दलाई स्वागत छ । अरु दिनझैँ आज पनि हामी बितेको २४ घण्टाका मुख्यमुख्य समाचारसहित उपस्थित भएका छौँ–

कांग्रेस सभापति तथा प्रधानमन्त्री शेरबहादुर देउवाले गठबन्धन दलहरुलाई धोका दिन नसकिने बताएका छन् ।  शनिबार पार्टी कार्यालयमा बसेको केन्द्रीय कार्यसम्पादन समितिको बैठकमा बोल्दै देउवाले यस्तो बताएका हुन् ।

उनले गठबन्धन दलहरुकै सहयोगमा  आफू प्रधानमन्त्री बनेको उल्लेख गर्दै अहिले आएर सहयात्री दलहरूलाई धोका दिन नमिल्ने धारणा राखेको एक कार्यसम्पादन समिति सदस्यले बताए ।

केही नेताहरुले कांग्रेस एक्लै चुनावमा जानुपर्ने बताएपछि उनले यस्तो बताएका हुन् ।  देउवाले पार्टीले नै गठबन्धन गरेर चुनाव लड्ने निर्णय गरिसकेको भन्दै आफूले त्यहीअनुसार गठबन्धन दलसँग सहमति गरेको धारणा पनि राखे ।

देउवाले बैठकमा चितवनको भरतपुर महानगरपालिका माओवादीलाई छाड्ने संकेत पनि गरे ।  बैठकमा नेताहरुले भरतपुरको मेयर कुनै हालत छाड्न नहुने बताएका थिए । तर, देउवाले भरतपुर नगर कमिटीको सभापतिले आफूसँग उपमेयर लड्न तयार छु भनिसकेको बैठकमा बताएको ती नेताको भनाइ छ ।

०००

मोरङमा गठबन्धन दलका नेताहरूबीच दूरी बढिरहेका बेला नेपाली कांग्रेस विराटनगर महानगर समितिले मेयर र उपमेयरका उम्मेदवारहरूको नाम केन्द्रीय समितिलाई सिफारिस गरेको छ ।

मेयरका लागि सात जना र उपमेयरका लागि ११ जनाको नाम केन्द्रीय समितिलाई सिफारिस गरेको नगर सभापति दीपक चापागाईँले बताए ।

मेयरका लागि क्रमशः जिल्ला उपसभापति नागेश कोइराला, बहालवाला उपमेयर इन्दिरा कार्की, महानगर सभापति दीपक चापागाईँ, केन्द्रीय सदस्यहरू अमृत अर्याल, डा. डिला संग्रौला, बहालवाला मेयर तथा केन्द्रीय सदस्य भीम पराजुली र प्रदेश समिति सदस्य गोपाल रेग्मीको नाम केन्द्रीय कार्यालयमा बुझाएको महानगर समितिले जनाएको छ ।

यस्तै उपमेयरका लागि ११ जनाको नाम सिफारिस गरिएको चापागाइँले बताए ।

उनका अनुसार उपमेयरमा नीरज कोइराला, झुमा गौतम, प्रमीला गच्छदार, प्रमीला थापा, पुनम सिंह, जस्मिन मण्डल, पंकज बर्मा, दुर्गा कोइराला, डा.सीता घिमिरे, गीता सिलवाल र राजु मास्केको नाम सिफारिस गरिएको छ ।

केन्द्रले नै महानगरको भागबण्डाको टुंगो लगाउने बताइरहेका बेला महानगर समितिले भने मेयर र उपमेयर उम्मेदवारका लागि नाम सिफारिस गरेको हो । महानगर समितिले यसअघि नै विराटनगरमा गठबन्धन नगर्ने निर्णय गरेको थियो ।

०००

भरतपुर महानगरपालिका वडा नम्बर १७ का कांग्रेस कार्यकर्ताले सामूहिक राजीनामा दिँदै स्वतन्त्र अभियान घोषणा गरेका छन् ।

शनिवार भरतपुरको बेलुवा टोलमा भेला आयोजना गरेर पूर्व वडाध्यक्ष देवनारायण महतो, पूर्व वडा सभापति प्रकाश कँडेलसहितका कांग्रेसका क्रियाशील कार्यकर्ताले सामूहिक राजीनामा घोषणा गरेका हुन् ।

भरतपुर महानगरपालिका फेरि पनि माओवादी केन्द्रलाई जिम्मा लगाउन लागेको भन्दै उनीहरू विरोधमा उत्रिएका हुन् ।

स्थानीय तहको चुनावमा पाँच दलीय गठबन्धन गर्ने र यसअघि स्थानीय तहमा जुन पार्टीले जितेको छ सोही पार्टीको उम्मेदवार हुने केन्द्रीय तहमा सहमति भएपछि भरतपुर कांग्रेस असन्तुष्ट छ ।

भरतपुरमा पाँच दलीय गठबन्धन गरेर माओवादी नेतृ एवं वर्तमान मेयर रेनु दाहाललाई उम्मेदवार बनाएर कांग्रेस कार्यकर्ताले स्वतन्त्ररूपमा उम्मेदवार घोषणा गर्ने उनीहरुले चेतावनी दिएका छन् ।

०००

नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले गठबन्धन संघको निर्वाचनसम्म कायम रहने बताएका छन् ।

नवलपरासी बर्दघाट सुस्तापूर्व नवलपुरको देवचुलीमा भएको पार्टी प्रशिक्षण कार्यक्रममा बोल्दै उनले स्थानीय निर्वाचनमा मात्रै होइन संघको निर्वाचनसम्म गठबन्धन कायम रहने बताएका हुन् ।

‘गठबन्धनभित्र स्थानीय तह निर्वाचनमा तालमेल गर्ने कुरा सजिलो कुरा होइन, सबैलाई आफ्नो पार्टीले धेरै पाए हुन्थ्यो भन्ने छ । तर स्थानीय तहदेखि संघको निर्वाचनसम्म गठबन्धन कायम हुन्छ,’ उनले भने ।

साथै उनले संविधान विरोधीहरूले गणतन्त्रलाई उल्ट्याउन खोजेको आरोप लगाएका छन् ।

०००

नेकपा(एमाले)का अध्यक्ष केपी शर्माले मधेशको मुद्दा सम्बोधन गर्न आफ्नो पार्टी तयार रहेको बताएका छन् ।

सर्लाही सदरमुकाम मलंगवास्थित कभर्ड हलमा एमाले सर्लाहीद्वारा आज आयोजित कार्यक्रममा उनले भने, 'मधेशको मुद्दा सम्बोधन गर्न एमाले तयार छ ।'

नागरिकताको समस्या भोगिरहेका जनताका लागि नागरिकता विधेयक एमाले सरकारले ल्याए पनि पारित हुन नसकेको उनको भनाइ छ । उनले आगामी दिनमा आफ्नो पार्टीले मधेशी जनताका समस्या सम्बोधन गर्ने वाचासमेत गरे ।

०००

पर्सामा कांग्रेस र जसपाले स्थानीय निर्वाचनमा तालमेल नगर्ने भएका छन् ।

नेपाली कांग्रेसका पर्सा सभापति जनार्दन सिंह क्षेत्री र जसपा पर्सा अध्यक्ष रामनरेशप्रसाद यादवबीच शनिवार १४ वटै स्थानीय तहमा छुट्टाछुट्टै​ मित्रवत् प्रतिस्पर्धा गर्ने सहमति भएको हो ।

पर्सामा वीरगञ्ज महानगरपालिकासहित १४ वटा स्थानीय तह छन् । यी दुवै दल सत्ता गठबन्धनमा आबद्ध दल हुन् ।

०००

स्थानीय तहको निर्वाचनमा पाँच दलीय तालमेल गर्दा स्थानीय मतभार र राजनीतिक अवस्था हेरेर तल्लो तहका समितिलाई नै निर्णय गर्न दिनेबारे कांग्रेसको केन्द्रीय कार्य सम्पादन समितिको बैठकमा छलफल भएको छ ।

शनिबार कांग्रेसको केन्द्रीय कार्यालय सानेपामा चुनावी तालमेलका क्रममा उपमहानगरपालिका र महानगरपालिकामा सिट बाँडफाँटबारे छलफल गर्न केन्द्रीय कार्यसम्पादन समितिको बैठक बसेको थियो ।

बैठकमा स्थानीय तहमा तालमेल गर्दा स्थानीय समितिले गरेको निर्णयलाई मान्यता दिने र केन्द्रबाट दबाब नदिनेबारे छलफल भएको नेता गोपालमान श्रेष्ठले बताए ।

‘चुनावमा पाँच दलीय गठबन्धनसँग तालमेल गरेर जानुपर्छ भन्नेमा सबैको समान धारणा थियो । तर, स्थानीय आवश्यकताको आधारमा त्यहीँको समितिले गरेको निर्णयलाई मान्नुपर्छ भन्ने कुरा उठेको छ,’ श्रेष्ठले भने, ‘अघिल्लो चुनावमा पनि कांग्रेसभित्रकै नेताहरुका कारण कतिपय ठाउँमा तालमेल नगर्दा बिग्रिएको थियो । अहिले त्यस्तो गल्ती दोहोर्‍याउन हुँदैन भन्ने कुरा भएको छ ।’

०००

नेकपा माओवादी केन्द्रले एक जना पूर्वमन्त्रीको नाम मेयरमा सिफारिस गरेको छ ।  तनहुँको शुक्लागण्डकीको मेयरमा पूर्वमन्त्री आशा कोइरालाको नाम सिफारिस भएको हो ।

शनिबार बसेको नगर कमिटी बैठकले हाल गण्डकी प्रदेशसभा सदस्य रहेकी कोइरालालाई मेयर बनाउने निर्णय गरेको हो। कोइरालाले पार्टी पंक्तिको आग्रहअनुसार आफू मेयरमा उठ्न तयार रहेको बताइन् ।

पूर्वमन्त्री कोइराला गत चुनावमा भने काँग्रेस नेता प्रदीप पौडेललाई पराजित गर्दै प्रदेशसभामा विजयी भएकी थिइन् ।