३१ असार २०८३, बुधबार
वाणिज्य विभागले बजारमा उपभोग्य वस्तुको अभाव नभएको र हल्ला गरेर अभाव सिर्जना गरेको अवस्थामा अनुगमनबाट कारवाही हुने बताएको छ ।
वाणिज्य विभागले बिहीवार पत्रकार सम्मेलन आयोजना गरेरै कुनै पनि वस्तुको अभाव नभएको र कृत्रिम अभाव सिर्जना नगर्न आग्रह पनि गरेको हो । विभागका महानिर्देशक लिलाप्रसाद शर्माले अनुगमन दोब्बरले बढाइएकाले उपभोग्य वस्तुको अभाव नहुने र कृत्रिम अभाव सिर्जना गर्नेमाथि कारवाही हुने पनि बताए ।
महानिर्देशक शर्माका अनुसार अहिले दैनिक दैनिक २ देखि ३ टोलीले मात्रै बजार अनुगमन भइरहेको छ । अब यसलाई बढाएर दोब्बर बनाउँदै छ । कर्मचारी अभावले अनुगमन बढाउन नसकिएको गुनासो गर्दै उनले भने सरकारले कर्मचारी थप दिने हो भने गुनासो नै नआउने गरी अनुगमन गर्न विभाग तयार रहेको छ ।
विभागका अनुसार गुनासो आएको वा नआएको दुबै स्थानमा अनुगमन भइरहेको छ । बजारमा अभाव सिर्जना गर्ने, अस्वभाविक मूल्यवृद्धि गर्ने र उपभोक्तालाई दुःख दिएको विषयमा भने विभागमा उजुरी दिन अनुरोध गर्ने गरिएको छ ।
विभागले सामाजिक सञ्जाल, फोन वा लिखित उजुरीसहितको जुनसुकै माध्यमबाट पनि गुनासो दिन सकिने बताए । उपभोक्ताले गरेको गुनासोलाई विभागले सम्बोधन गर्ने प्रतिवद्धता पनि विभागले गरेको छ ।
विभागले यो वर्ष मात्रै २१८७ व्यापारिक फर्मको अनुगमन गरेर कैफियत देखिएका १०१२ फर्मलाई कारवाही गरिएको छ । यसबाट १ करोड १८ लाख रुपैयाँ जरिवानासमेत गराएको छ ।
