विश्व स्वास्थ्य संगठन (डब्ल्यूएचओ) का महानिर्देशक डा. टेड्रोस अधानोम गेब्रेयससले ललितपुरको पाटन माध्यमिक विद्यालयस्थित खोपकेन्द्रको शुक्रवार अवलोकन गरेका छन् । 

खोप केन्द्रबाट अहिले १५ महिनाभन्दा माथिका र १५ वर्षभन्दा कम उमेर समूहका बालबालिकालाई टाइफाइडविरुद्धको खोप सञ्चालन भइरहेको छ । 

गत चैत २५ गतेबाट सरकारले देशभरका विभिन्न विद्यालयका खोपकेन्द्र स्थापना गरी टाइफाइडविरुद्धको खोप अभियान सञ्चालन गरिरहेको छ । 

यो अभियान वैशाख १८ गतेसम्म सञ्चालन हुनेछ । 

त्यस्तै सरकारले खोपकेन्द्रहरूबाट टाइफाइडविरुद्धको खोप र कोरोनाबिरुद्धको खोप पनि सञ्चालन गरिरहेको जनाएको छ । 

खोपकेन्द्र अवलोकनका क्रममा महानिर्देशक गेब्रेयससले ललितपुर महानगरपालिकाका मेयर चिरिबाबु महर्जनसँग भेट गरेका थिए । 

भेटपछि सञ्चारकर्मीहरूसँग बोल्दै मेयर महर्जनले महानिर्देशक गेब्रेयससले नेपालले कोभिड–१९ विरुद्ध सफलता पाएको र सोही कामको अवलोकन गरेको बताए ।