चालू आर्थिक वर्षको ९ महिनामा व्यापार घाटा १३ खर्ब रूपैयाँ नाघेको छ । 

यस्तो व्यापार घाटा गत आवको सोही अवधिको तुलनामा २८.४७ प्रतिशतले बढेको छ । गत वर्ष यो अवधिमा १० खर्ब १ रूपैयाँको मात्रै व्यापार घाटा थियो । 

यो वर्षको चैतसम्ममा नेपालमा विभिन्न देशबाट भित्रिएका वस्तुहरूको आयात १४ खर्ब ६६ अर्ब रूपैयाँको रहेको छ । यस्तो आयात पनि अघिल्लो वर्षको सोही अवधिको तुलनामा ३१.७९ प्रतिशतले बढेको देखिएको छ । गत वर्षको यो अवधिमा नेपालमा भएको यस्तो आयात ११ खर्ब ११ अर्ब रूपैयाँको थियो । 

यो अवधिसम्ममा नेपालको निर्यात हिस्सा ९.१३ प्रतिशतको मात्रै छ । नेपालको कुल वैदेशिक व्यापार यो अवधिसम्ममा १६ अर्ब २७ करोड रूपैयाँ पुगेको छ । 

यस्तो वैदेशिक व्यापार यो वर्ष ३४.९१ प्रतिशतले बढेको भन्सार विभागले शुक्रवार सार्वजनिक गरेको तथ्यांकले देखाएको छ । गत वर्षको यो अवधिमा नेपालको कुल वैदेशिक व्यापार १२ खर्ब रूपैयाँ थियो । 

निर्यात बढे पनि आयातको तुलनामा न्यून हिस्सा मात्रै

यो अवधिमा नेपालबाट निर्यात हुने वस्तु ६९.४४ प्रतिशत रहेको छ । 

गत वर्षको तुलनामा यो वर्ष बढेको निर्यात उल्लेख्य भए पनि आयातको तुलनामा न्यून हिस्सा मात्रै हो । साढे १४ खर्बभन्दा बढीको आयातमा एक खर्ब ६० अर्ब रूपैयाँको मात्रै निर्यात भएको तथ्यांकले देखाएको छ । यस्तो निर्यात गत वर्षको यो अवधिमा ९४ अर्ब रूपैयाँ मात्रै थियो । 

पेट्रोलियम पदार्थको आयात नै साढे २ खर्ब नाघ्यो 

यो अवधिमा पेट्रोलियम पदार्थको आयात साढे दुई खर्ब रूपैयाँ नाघेको छ । 

चैतसम्ममा नेपाल भित्रिएको पेट्रोलियम पदार्थको आयात दुई खर्ब ५७ अर्ब रुपैयाँको छ । यो रकम गत वर्षको तुलनामा यो वर्ष एक खर्ब ९ अर्ब रूपैयाँले बढेको हो । 

यस्तो आयात गत वर्षको तुलनामा यो वर्ष ७३.६४ प्रतिशतले बढेको देखिएको छ । गत वर्षको ९ महिनामा नेपालमा पेट्रोलियम पदार्थको आयात एक खर्ब ४८ अर्ब रूपैयाँको मात्रै थियो ।