०८ साउन २०८३, शुक्रबार
बेलायतका प्रधानमन्त्री बोरिस जोनसनले युक्रेनमा रुसले चलाएको विशेष सैन्य कारवाहीमा रुस विजयी हुन सक्ने बताएका छन् ।
एकजना सञ्चारकर्मीले जोनसनलाई रुसको विजय हुन सक्ला भनी प्रश्न सोधेपछि जोनसनले वास्तविक रूपमा त्यस्तो अवसर रहेको बताए । रुसका राष्ट्रपति भ्लादिमिर पुटिन युक्रेनीहरूलाई पिँध्न दृढनिश्चयी रहेको पनि उनले बताए ।
उनले भने, ‘रुसको विजय वास्तविक सम्भावना रहेको दुःदख सम्भावना हो । पुटिनसँग विशाल सेना छ र उनी अहिले राजनीतिक रूपमा कठिन परिस्थितिमा छन् । उनले अहिलेको जस्तो आर्टिलरी प्रहार गर्दै युक्रेनीहरूलाई क्रमशः पिँध्दै लग्ने काम जारी राख्नेछन् । उनले मरिउपोलसम्मको स्थलमार्ग सुरक्षित पार्न लागिसकेका छन् । अहिलेको परिस्थिति पूर्वानुमान गर्न नमिल्ने छ । हामीले यथार्थ आकलन गर्नुपर्ने हुन्छ ।’
फाइनान्सियल टाइम्स पत्रिकाले जोनसनको यो अभिव्यक्तिले जी७ मुलुकहरूमा फाटो आएको संकेत दिएको विश्लेषण गरेको छ ।
पत्रिकामा लेखिएको छ, ‘रुसले सैन्य कारवाहीमा सफलता पाउन सक्ने भनी स्वीकार गर्ने पहिलो प्रमुख पश्चिमी नेता जोनसन नै हुन् । केही हप्ताअघिसम्म पनि उनी रुसको हार हुँदैछ भन्ने विषयमा ढुक्क थिए । जी७ मुलुकका नेताहरूको एकीकृत मोर्चामा पनि फाटो आएको देखिन्छ ।’
