‘लोकान्तर राउण्ड अप’ मा पाठकवृन्दलाई स्वागत छ । अरु दिनझैँ पनि पनि हामी लोकान्तरको नियमित प्रस्तुती लिएर आजका छौँ । 
वैशाख ३० गतेका लागि तय भएको स्थानीय तह निर्वाचन अन्तरगत उम्मेदवारी दर्ताको पहिलो दिन आइतबार अधिकांश साना र स्वतन्त्र उम्मेदवारले मात्रै आफ्नो उम्मेदवारी दर्ता गराएका छन् । ठूला दल नेपाली काँग्रेस, नेकपा एमाले र माओवादी केन्द्रलगायत आइतबार दिनभर भागबण्डा मिलाउन व्यस्त रहे । अझै पनि कतिपय स्थानीय तहहरुमा भागबण्डा नमिलेको बताइएको छ । निर्वाचन आयोगले मनोनयन दर्ताका लागि दिएको समयसीमा सोमबार साँझ ५ बजे सकिँदैछ । ठूला दलहरुले आज भागबण्डा मिलाएर उम्मेदवारी दर्ता गराउनेछन् । 
००००
सत्तारुढ पाँच दलीय गठबन्धनले देशभरका स्थानीय तहमा तालमेल गर्न अधिकतम कोशिस गर्ने निर्णय गरेको छ । आइतबार बसेको गठबन्धन बैठकले सोमबार मनोनयन अघिसम्म बाँडफाँड मिलाउन अधिकतम कोशिस गर्ने निर्णय गरेको माओवादी केन्द्रका अध्यक्ष प्रचण्डका स्वकीय सचिव रमेश मल्लले जानकारी दिए । गठबन्धनभित्र स्थानीय तहहरुमा भागबण्डा नमिलेको अवस्थामा यस्तो निर्णय भएको हो । 
यस्तै सोमबार  बिहान ८ बजे पाँचै दलका अध्यक्षहरू बसेर बाँकी विषय मिलाउने सहमति पनि भएको छ । यस्तै विगत समझदारीलाई सबै पक्षले इमान्दारिताका साथ पालना  गर्ने सहमति पनि भएको छ । यसैबीच पाँच दल बाहिर तालमेल नगर्ने यसअघिको निर्णयलाई गठबन्धनले दोहोर्याएको छ ।
००००
स्थानीय तह सदस्य निर्वाचन २०७९ का लागि मनोनयनको पहिलो दिन आइतबार काठमाडौँ महानगरपालिकाका लागि १६ जनाले मेयर पदका लागि मनोनयन दर्ता गरेका छन् ।  राष्ट्रिय सभा गृहमा स्थापना गरिएको प्रमुख निर्वाचन अधिकृतको कार्यालयमा ४ जना महिला र १२ जना पुरुषले उम्मेदवारी दर्ता गराएका हुन् । निर्वाचन कार्यालयका शाखा अधिकृत प्रेमकुृमार श्रेष्ठकाअनुसार पार्टीको प्रतिनिधित्व गर्दै ७ जनाले र स्वतन्त्र रुपमा ९ जनाले मनोनयन दर्ता गराएका हुन् ।  यसरी मनोनयन दर्ता गराउने पार्टीहरूमा विवेकशील साझा पार्टी, मंगोल नेशनल अर्गनाइजेसन, नेपाल समावेशी पार्टी, मौलिक जरोकिलो पार्टी, सचेत नेपाल पार्टी, राष्ट्रिय यथार्थवादी पार्टी नेपाल, आधुनिक नेपाल समाजवादी पार्टी रहेका छन् ।  
यससँगै उपमेयर पदमा १७ जनाले मनोनयन दर्ता गराएका छन् । यसैगरी वडाध्यक्षमा २३ जना र वडा सदस्यमा ७ जनाले मनोनयन पत्र दर्ता गराएका छन् ।
००००
टिकटको विषयमा विवाद हुँदा काभ्रेको नमोबुद्ध नगरपालिकामा दुई पक्षबीच झडप भएको छ । सो क्रममा एक समूहले नगरपालिकाका मेयरका दावेदार रोशन पाण्डेमाथि कुटपिट भएको छ । बनेपामा पाण्डेलाई काँग्रेस काभ्रेका क्षेत्रीय सभापति तथा मेयरका उम्मेदवार कुन्साङ लामा समूहले कुटपिट गरेको आरोप लागेको छ । कुटपिटबाट पाण्डेको शरीरको विभिन्न भागमा चोट लागेको छ ।
००००
कैलालीको कैलारी गाउँपालिका–७ बिपतपुर मुक्तकमैया शिविरमा लागेको आगो झण्डै ४ घण्टापछि नियन्त्रणमा आएको छ । आइतवार दिउँसो साढे १ बजेदेखि शुरू भएको आगलागी साँझ साढे ४ बजे मात्रै नियन्त्रणमा आएको जिल्ला प्रशासन कार्यालय कैलालीले जनाएको छ । तर, अझै घरका खामामा लागेको आगो ननिभेको कैलालीका प्रमुख जिल्ला अधिकारी किरण थापाले जानकारी दिए ।
००००
अख्तियार दुरुपयोग अनुसन्धान आयोगले कञ्चनपुरका तत्कालीन महेन्द्रनगर नगर विकास समितिका पदाधिकारीसहित ६४ जना विरुद्ध आइतवार भ्रष्टाचारको मुद्दा दर्ता गरेको छ ।
अख्तियारले आइतवार विशेष अदालत काठमाडौंमा आरोपपत्र दर्ता गरेको हो । नगर विकास समितिको स्वामित्वमा रहेको जग्गा गैरकानूनी तवरले लिज तथा बिक्री गरी सार्वजनिक सम्पत्तिको हिनामिना गरेर भ्रष्टाचार गरेको भन्दै उनीहरूविरुद्ध मुद्दा दर्ता गरिएको अख्तियारका प्रवक्ता श्यामप्रसाद भण्डारीले जानकारी दिएका छन् ।
००००
सम्मानजनक रुपमा टिकट वितरण नभएको भन्दै सत्ता गठबन्धनमा रहेको जनता समाजवादी पार्टीले बुटवल उपमहानगरपालिकाको मेयर र उपमेयरमा उम्मेदवारी दिएको छ । बुटवलस्थित निर्वाचन कार्यालयमा मेयरमा सुरज हितान मगर र उपमेयरमा सम्झना पौडेलले मनोनयन दर्ता गरेका हुन् ।
००००
ललितपुर महानगरपालिकाको मेयरमा ८ जना र उपमेयरमा ३ जनाको उम्मेदवारी परेको छ । ललितपुर महानरपालिकाका प्रमुख निर्वाचन अधिकृत विष्णु पाण्डेका अनुसार मेयरमा राष्ट्रिय जनमुक्ति पार्टी, आमूल परिवर्तन मसिहा पार्टी, मजदुर किसान पार्टी, मौलिक जरोकिलो पार्टी, राष्ट्रिय प्रजातन्त्र पार्टी, विवेकशील पार्टी, नेकपा माले र स्वतन्त्रले उम्मेदवारी दिएका हुन् ।
००००
विराटनगर महानगरपालिकाको नगर प्रमुखमा तीन जनासहित ५६ जनाले उम्मेदवारी दर्ता गराएका छन् । निर्वाचन अधिकृतको कार्यालयका अनुसार दुई जनाले स्वतन्त्रबाट मेयरमा मनोनयन दर्ता गराएका छन् । एक जनाले सिके राउत नेतृत्वको जनमत पार्टीबाट मनोनयन दर्ता गराएका हुन् ।
००००
नेपाली कांग्रेसले टिकट वितरणका लागि संसदीय बोर्ड गठन गरेको छ । कांग्रेस केन्द्रीय कार्यसम्पादन समितिको आइतवार बसेको बैठकले कांग्रेसका पदाधिकारी र नेता रामचन्द्र पौडेल सदस्य रहने गरी संसदीय बोर्ड गठन गरेको हो ।
००००
पछिल्लो २४ घण्टामा १३ जनामा संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार चार हजार २५५ नमूना परीक्षणमध्ये १३ जनामा संक्रमण देखिएको हो । पछिल्लो २४ घण्टामा कुनै पनि संक्रमितको मृत्यु भएको छैन । हालसम्मको मृत्यु संख्या ११ हजार ९५१ छ । मन्त्रालयका अनुसार थप २५ जना संक्रमणमुक्त भएका छन्  । हाल मुलुकभर २६९ सक्रिय संक्रमित छन् ।
००००
स्थानीय निकायको चुनावका लागि उम्मेदवारी दर्तासँगै शेयर बजार पनि तातेको छ । आज नेप्से परिसूचक नेप्से एकै दिन ९५.४६ अंकले बढेको छ । शेयर बजार आज ४.११ प्रतिशतले बढ्दा नेप्से परिसूचक २४२०.९१ विन्दूमा पुगेको छ ।
००००
जनता समाजवादी पार्टी (जसपा)ले स्थानीय निर्वाचनको घोषणापत्र सार्वजनिक गरेको छ । ‘पहिचान, संघीयता, सुशासन र सदाचार, स्थानीय सरकार समृद्धिको मूल आधार’ भन्ने मुख्य नारासहित जसपाले घोषणापत्र सार्वजनिक गरेको हो ।
००००
नेपाली कांग्रेसले स्थानीय तह निर्वाचनका लागि संकल्प पत्र सार्वजनिक गरेको छ । पार्टी केन्द्रीय कार्यालय सानेपामा आइतवार दिउँसो विशेष कार्यक्रमबीच पार्टीको संकल्प पत्र सार्वजनिक गरिएको हो ।
००००
पोखरा महानगरपालिकामा मेयर पदमा बागी उम्मेदवारी परेको छ । गठबन्धनको भागबण्डामा पोखरा महानगर नेकपा एकीकृत समाजवादीको भागमा परेपछि कांग्रेसका क्षेत्रीय प्रतिनिधि विमलबहादुर कार्कीले स्वतन्त्र उम्मेदवारी दर्ता गराएका हुन् ।
००००
काठमाडौं महानगरपालिकाको मेयरमा बालेन शाहले उम्मेदवारी दर्ता गराएका छन् । उनले स्वतन्त्र रुपमा उम्मेदवारी दर्ता गराएका हुन् । उनी सांगीतिक क्षेत्रमा व्यक्ति हुन् ।
००००
बागमती प्रदेश सभा सदस्य केशव स्थापितले राजीनामा दिएका छन् । काठमाडौं महानगरपालिकाको मेयरमा नेकपा एमालेबाट उम्मेदवार बन्ने भएपछि उनले प्रदेश सभा सदस्य पदबाट राजीनामा दिएका हुन् ।
००००
विवेकशील साझा पार्टीले काठमाडौं महानगरपालिकाको मेयर र उपमेयरमा उम्मेदवारी दर्ता गराएको छ ।  मेयरमा समीक्षा बाँस्कोटा र उपमेयरमा कीर्ति तुलाधरले उम्मेदवारी दर्ता गराएका हुन् ।