०७ साउन २०८३, बिहीबार
नेकपा एमालेले स्थानीय तहको निर्वाचनको लागि हेटौंडा उपमहानगरपालिकामा मेयर/उपमेयरसहित १९ वटै वडाध्यक्ष र सदस्यको उम्मेदवारी दर्ता गरेको छ ।
एमालेको तर्फबाट उपमहानगरपालिकाको मेयरमा अनन्तप्रसाद पौडेल तथा उपमेयरमा सुमित्रा काफ्लेले उम्मेद्वारी दर्ता गरेकी हुन् ।
एमालेको तर्फबाट मेयरमा उम्मेदवारी दिएका पौडेलको प्रस्तावकमा वर्तमान मेयर हरिबहादुर महत तथा समर्थकमा जिल्ला समन्वय समितिका प्रमुख रघुनाथ खुलाल छन् ।
उपमेयर काफ्लेको प्रस्तावकमा एमाले नेत्री आरती पाठक तथा समर्थकमा सिता विष्ट छन् ।
एमाले जिल्ला पार्टी कार्यालय हेटौंडाबाट र्यालीसहित उम्मेदवारी दर्ताको लागि उम्मेदवार तथा कार्यकर्ता मुख्य निर्वाचन अधिकृतको कार्यालय पुगेका थिए । हेटौंडा उपमहानगरपालिकामा नेकपा एमालेले बहुदल प्राप्त भएपछिका सबै स्थानीय तहको निर्वाचनमा मेयर/उपमेयरमा जीत हासिल गरेको छ ।
संघीयतापछि भएको स्थानीय तहको निर्वाचन २०७४ मा पनि एमालेले माओवादी–कांग्रेसको गठबन्धनलाई पराजित गर्दै हेटौंडाको मेयर/उपमेयरसहित १९ मा १२ वडाको वडाध्यक्ष जितेको थियो ।
एमालेबाट मेयरमा हरिबहादुर महत तथा उपमेयरमा मीनाकुमारी लामा विजयी भएकी थिइन् ।
