२१ असार २०८३, आइतबार
सशस्त्र प्रहरी बलमा १९ वैशाखदेखि रिक्त हुने अतिरिक्त महानिरीक्षक (एआईजी) पदपूर्तिका लागि प्रक्रिया अघि बढाइएको छ ।
गृह मन्त्रालय बढुवा समितिको सचिवालयले आकांक्षीलाई आवश्यक कागजात बुझाउन शुक्रवार ढिलोमा ५ दिनको समय दिएर पदपूर्तिसम्बन्धी सूचना निकालेको छ ।
सूचनामा १९ वैशाखदेखि अनिवार्य अवकाशमा जान लागेका सशस्त्र प्रहरी महानिरीक्षक पुष्पराम केसीले बढुवा समितिको सदस्य सचिवका हैसियतले दस्तखत गरेका छन् । त्यसदिन केसी र एआईजी रामशरण पौडेलले अनिवार्य अवकाश पाउँदैछन् ।
आकांक्षीलाई आवश्यक काजजात बुझाउन ५ दिनको समय दिइएको भए पनि शनिवार र आइतवार सार्वजनिक बिदा परेको छ । सोमवार पनि सार्वजनिक बिदा दिने सम्भावना छ । त्यसैले आकांक्षीलाई मंगलवार १ दिन मात्र आवश्यक कागजात बुझाउन समय बाँकी रहने देखिएको छ ।
गृह मन्त्रालय बढुवा समितिको सचिवालयले ३० चैतमा रिक्त एक एआईजी पदका लागि सूचना निकाल्दा आवश्यक कागजात बुझाउने नायब महानिरीक्षक (डीआईजी) हरूले नै योपटक कागजात बुझाउनेछन् । त्यस दिनको सूचनाअनुसार वरिष्ठतामा पहिलो नम्बरमा रहेका डीआईजी राजु अर्याललाई बढुवा समितिले एआईजीका लागि सिफारिस गरेको थियो । अर्यालले बुधबार सो दर्जाको दज्र्यानी चिह्न लगाएर कामसमेत थलिसकेका छन् । उनैले १९ वैशाखदेखि सशस्त्रको नेतृत्व हाँक्दैछन् ।
अहिले डीआईजीको वरिष्ठताक्रममा नारायणदत्त पौडेल पहिलो नम्बरमा छन् । दोस्रोमा चन्द्रप्रकाश गौतम र तेस्रोमा वंशी दाहाल छन् ।
पौडेल र गौतम अर्यालसँगै १३ कात्तिक २०७५ मा डीआईजीमा बढुवा भएका थिए । दाहाल भने पौडेल र अर्यालभन्दा १५ महिनापछि २२ माघ २०७६ मा डीआईजीमा बढुवा भएका थिए ।
अर्याल, पौडेल र दाहाल प्रहरी सेवामा सँगै १८ चैत २०५४ मा भर्ना भएका थिए । गौतम भने नेपाली सेनाबाट स्थानान्तरण भई आएका हुन् । राजधानीमा खबर छ ।
