नेपाल–भारतको  सीमाक्षेत्र  विराटनगर–१८,  इस्लामपुरमा भारतीय सुरक्षाकर्मीले बिनाकारण हवाई फायर गरेको छ ।

सीमा सुरक्षामा खटिएका भारतीय एसएसबी टोलीका एक जना जवानले तीन राउन्ड हवाई फायर गरेपछि सीमा क्षेत्रका नेपाली आतङ्कित बनेका छन् ।

ड्युटीमा खटिएका एसएसबी जवानले दुई राउन्ड जमिन तर्फ र एक राउन्ड आकाशमा फायर गरेको विराटनगर–१८, इस्लामपुरका स्थानीय सुरज मण्डलले जानकारी दिए।

सोमबार दिउँसो २ बजे सो घटना भएको थियो । स्थानीयका   अनुसार   ड्युटीमा   खटिएका   एसएसबीका जवान मदिरा सेवन गरी लठ्ठ भएको अवस्थामा  थिए  ।

सीमा  क्षेत्रमा  खटिएका  एक  सुरक्षाकर्मीका  अनुसार,  एसएसबीका  जवानले  होहल्ला  गरेपछि  स्थानीयले  एसएसबीको  टोलीलाई  घेराउ गरेका थिए ।

स्थानीयको भीड बढेपछि आफ्नो सुरक्षाको लागि भन्दै हवाई फायर गरेको हुनसक्ने ती सुरक्षाकर्मीको भनाइ छ ।

यद्यपि हवाई फायरबाट कुनै मानवीय क्षति भने भएको छैन । मोरङका प्रहरी प्रमुख एसपी शान्तिराज कोइरालाले दसगजा क्षेत्रमा गोली चलेको पुष्टि गरे।

उनले  भने, 'गोली  चलेको  नेपालतिर  होइन भारतीय क्षेत्रमा हो । के विषयमा चलेको हो, थाहा भएन । हामीले पनि बुझ्ने प्रयास गरिरहेका छौँ ।' गोरखापत्र दैनिकमा खबर छ ।