२३ जेठ २०८३, शनिबार
काठमाडौं महानगरसहित देशका ६ वटै महानगरमा भइरहेको मतगणनाको प्रारम्भिक रुझानमा एमाले पछि परेको छ ।
आइतवार बिहानसम्म गणना भइरहेका ६ वटै महानगरमा एमाले दोस्रो पोजिसनमा देखिएको छ ।
लाखभन्दा बढी भोट भएका महानगरमा भर्खर ५ हजारसम्म गणना भएकाले यो नतिजा प्रारम्भिक मात्र हो ।
काठमाडौं महानगरमा स्वतन्त्र उम्मेदवार बालेन शाहले २ हजार ७१ भोट पाउँदा दोस्रो पोजिसनमा रहेका केशव स्थापितले १ हजार १ सय ६४ मत प्राप्त गरेका छन् ।
शुरूआती अग्रता लिएका बालेनले मतान्तर फराकिलो बनाउँदा स्थापित दोस्रो स्थानमा छन् ।
सत्ता गठबन्धनकी साझा उम्मेदवार सिर्जना सिंह तेस्रो स्थानमा छिन् । २०७४ सालको स्थानीय तह निर्वाचनमा काठमाडौंमा एमालेले फराकिलो अन्तरले जीत हासिल गरेको थियो ।
ललितपुर महानगरपालिकामा नेपाली कांग्रेसका चिरिबाबु महर्जनले ७ सय ६ भोट पाउँदा एमालेका हरिकृष्ण ब्यञ्जनकारले ३ सय ३६ मत पाएका छन् ।
गत स्थानीय तह निर्वाचनमा भिडेका दुई उम्मेदवारबीच तीव्र प्रतिस्पर्धा चलिरहेको छ । २०७४ सालमा कांग्रेस उम्मेदवार महर्जन झिनो मतान्तरले विजयी भएका थिए ।
पोखरा महानगरमा गठबन्धनका साझा उम्मेदवार नेकपा एसका धनराज आचार्यले ६ सय १३ मत पाउँदा नेकपा एमालेका कृष्ण थापाले ५ सय ८३ मत पाएका छन् ।
२०७४ सालको स्थानीय तह निर्वाचनमा पोखरामा एमालेले फराकिलो मतान्तरसहित मेयर र उपमेयर जितेको थियो ।
चितवनको भरतपुरमा माओवादीकी रेनु दाहालले १ हजार १ सय ७८ मत पाउँदा एमालेका विजय सुवेदीले १ हजार ६८ मत पाएका छन् ।
गठबन्धन दललाई तालमेलमा अप्ठ्यारो भएको भरतपुरमा कांग्रेसका बागी उम्मेदवार जगन्नाथ पौडेलले ४ सय ११ मत पाएका छन् ।
पर्साको वीरगञ्जमा गठबन्धनका साझा उम्मेदवार राजेशमान सिंहले १ हजार ५ सय ७ मत प्राप्त गर्दा एमालेका विजय सरावगीले ६ सय ६८ मत प्राप्त गरेका छन् ।
यसअघि जसपाबाट मेयर जितेका सरावगी चुनावको पूर्वसन्ध्यामा एमाले प्रवेश गरेका थिए । सरावगी आएसँगै वीरगञ्जमा जीत निकाल्ने एमालेको दाबी थियो ।
विराटनगरमा कांग्रेसका नागेश कोइरालाले २ हजार ५ सय ८३ मत प्राप्त गर्दा एमालेका सागरकुमार थापाले १ हजार ९ सय ९० मत प्राप्त गरेका छन् ।
कांग्रेसको गठ मानिएको र यसअघि पनि कांग्रेसले जितेको विराटनगरमा एमालेले यसपटक ‘चमत्कार’ गर्ने दाबी गरेको थियो ।
मतगणना भइरहेका १० उपमहानगरमध्ये ९ वटामा एमाले पछाडि परेको छ । अघिल्लोपटक कांग्रेसले जितेको कलैयामा मात्र एमालेले अग्रता कायम गरेको छ ।
देशभर पनि नेकपा एमाले दोस्रो पोजिसनमा देखिएको छ ।
आइतवार बिहानसम्म मतगणना जारी रहेका स्थानीय तहमध्ये नेपाली कांग्रेस २ सय ६६ स्थानमा अग्रता हासिल गर्दा नेकपा एमाले १ सय ७५ स्थानमा अगाडि छ ।
माओवादी केन्द्र १ सय ८ स्थानमा अगाडि देखिएको छ ।
