नुवाकोटको ककनी गाउँपालिकामा एक व्यक्ति विद्युतको पोल हुँदै विद्युत प्रसारण लाइनमा चढेपछि ६० मेगावाटको त्रिशुली थ्री–ए आयोजना नै बन्द भएको छ । 

शनिवार बिहान करीब १० बजेतिर नुवाकोटकै बोलकोटगढी नगरपालिका वडा नम्बर–१३ का स्थानीय माइला विक ककनीको चतुराले भन्ने ठाउँबाट विद्युतको पोलमा चढेका थिए ।

विद्युतको पोलबाट हाइटेन्सन प्रसारण लाइनमा गएर उनले प्रसारण लाइनको तार हल्लाउने र हिँड्ने काम गरिरहेको ककनी गाउँपालिकाका अध्यक्ष सुमन तामाङले लोकान्तरसँग बताए । 

‘बिहानैदेखि एक व्यक्ति विद्युतको पोल हुँदै तारमा चढेपछि विद्युत आयोजना नै बन्द गर्न लगाइएको छ । प्रहरीले उनलाई ओराल्ने प्रयास गरिरहेको भए पनि अहिलेसम्म ओराल्न सकिएको छैन,’ तामाङले भने । 

ती व्यक्तिको मानसिक स्वास्थ असन्तुलित रहेको खुलेको तामाङले बताए । ‘प्रहरीले उनलाई फकाएर ओराल्ने प्रयास गरिरहेका छन् । तर, उनी मानिरहेका छैनन् । उनलाई ओराल्न पोलमै चढ्दा हामफाल्न सक्ने र ज्यान नै जोखिममा पर्न सक्ने भएकाले प्रहरी पोलमा चढेका छैनन्,’ तामाङले भने ।

विद्युतको तार हल्लाइरहेका उनलाई स्थानीय बासिन्दा र प्रहरीले बियर खुवाउने, पैसा दिने भनेर फकाउने प्रयास गरिरहेको भए पनि उनी प्रसारण लाइनको तारबाट ओर्लिन नमानेको तामाङले बताए ।

ती व्यक्ति चढेको पोलमा त्रिशुली थ्री–ए आयोजनाबाट काठमाडौंमा विद्युत ल्याइएको २२० केभी प्रसारण लाइन जडान भएको छ । उक्त प्रसारण लाइनमा डबल सर्किट छ ।

प्रसारण लाइनमा चढेका व्यक्तिलाई करेन्ट लाग्न सक्ने डरले त्रिशुली थ्री–ए आयोजना नै बन्द गरेर बस्नुपर्दा काठमाडौंमा विद्युत आपूर्तिमा समस्या हुन थालेको विद्युत प्राधिकरणले बताएको छ ।