०८ साउन २०८३, शुक्रबार
हुम्लाको उत्तरी नाम्खा गाउँपालिकामा विदेशी पर्यटकलाई लुटपाट गर्न खोजेको अभियोगमा सात जनालाई प्रहरीले नियन्त्रणमा लिएको छ ।
ग्रेट हिमालयन ट्रेलको यात्रामा रहेका एक जर्मनीका नागरिकलाई लुटपाट गर्न खोजेको अभियोगमा प्रहरीले हिल्सा–सिमकोट सडक निर्माणमा संलग्न सात जना कामदारलाई नियन्त्रणमा लिएको हो ।
पक्राउ पर्नेमा हिमाल सुनार, कमल थापा, छविलाल बस्नेत, माधव थापा, गणेश सुनार, खेम सुनार र विजय विष्ट रहेका छन् । उनीहरूको दाङको घोराही र तुलसीपुरका स्थायी वासिन्दा रहेको प्रहरी निरीक्षक दीपक मल्लले जानकारी दिए । उनका अनुसार नियन्त्रणमा लिइएका सबै जनालाई नाम्खाबाट सदरमुकामतर्फ ल्याइँदै छ ।
नाम्खा गाउँपालिका–५ नारा लेकबाट हिल्सातर्फ जाँदै गरेका ३८ वर्षीय मेटियर्स इक्मालाई उनीहरूले लुटपाटको प्रयास गरेका थिए । घटनापछि इक्माले प्रहरीमा दिएको उजुरीका आधारमा उनीहरूलाई नियन्त्रणमा लिइएको हो ।
