अल्पसंख्यक कोटाबाट सांसद (प्रदेशसभा सदस्य) भएकी एमालेकी गुलेफुन खातुनले राजीनामा दिएपछि खसआर्य कोटाकी हिमा बस्नेत भट्टराई प्रदेश १ की सांसद बनेकी छिन् । सरकारी कागजात कीर्ते गरेको अभियोगमा दोषी ठहरिएपछि खातुनले पदबाट राजीनामा दिएकी थिइन् । खातुनले राजीनामा दिएपछि सो पद खाली भएको थियो । 

भट्टराईलाई निर्वाचन आयोगले सोमवार पत्र दिएको एमालेका प्रमुख सचेतक बुद्धि कुमार राजभण्डारीले बताए । एमालेले आयोगलाई बन्द सूचीबाट बस्नेतलाई सांसद नियुक्ति गर्न यसअघि नै पत्र पठाएको थियो ।
सोही पत्रका आधारमा भट्टराईलाई  सांसद पदमा चयन गरिएको हो । अल्पसंख्यक कोटा भएपनि बन्द सूचीमा अल्पसंख्यक कोही नभएकाले खसआर्य कोटाबाट ल्याउनु परेको सचेतक राजभण्डारीले बताए । भट्टराई अधिवक्ता हुन् । 

मोरङको तत्कालीन कदमाहा गाउँ विकास समितिमा रहेको ३ कट्ठा १० धुर जग्गाको मोही प्राप्त गर्न खातुनले कागजात, हस्ताक्षर र सरकारी छाप किर्ते गरेको अदालतले पुष्टि गरेको छ । २०७१ साल चैत महिनामा गाविस सचिवको तर्फबाट सिफारिस गरेको पत्र तयार पार्दै दुईवटा सिफारिसमा एउटै दर्ता नम्बर भेटिएपछि किर्ते गरेको भन्दै मुद्दा परेको थियो ।

सोही मुद्दामा जिल्ला अदालत मोरङले दोषी प्रमाणित गर्दै एक वर्ष कैद सजाय हुने फैसला सुनाएको थियो । त्यसविरुद्ध पुनरावेदन गर्न उच्च अदालत पुगेकी खातुनको मुद्दामा उच्च अदालतले सजाय थप गरी एक वर्ष कैद र १४ हजार ५८३ रुपियाँ जरिवाना हुने फैसला गरेको थियो । 
हिमाको मंगलवार ११ बजेका लागि शपथग्रहण कार्यक्रम तय गरिएको संसद सचिवालयका सचिव गोपाल पराजुलीले जानकारी दिए ।