संवैधानिक परिषदसम्बन्धी विधेयक फिर्ता हुन्छः गगन थापा

नेपाली कांग्रेसका महामन्त्री गगन थापाले सरकारले राष्ट्रियसभामा पेस गरेको संवैधानिक परिषद्सम्बन्धी विधेयक फिर्ता हुने बताएका छन् । उक्त विधेयक आज-भोलि मै फिर्ता हुने उनको दाबी छ । 

नेपाली कांग्रेस ललितपुर क्षेत्र नम्बर २ प्रदेश सभा (क) ले सोमवार आयोजना गरेको भेलालाई सम्बोधन गर्ने क्रममा उनले उक्त विधेयकको सबैतिरबाट आलोचना भएकाले फिर्ता गरिन लागेको जानकारी दिएका हुन् । 

उनले प्रधानमन्त्री तथा पार्टी सभापति शेरबहादुर देउवाले भेटेर उक्त विधेयक फिर्ता लिन आफूहरूले आग्रह गरेको जानकारी दिए । भेटका क्रममा सभापति देउवाले आफूहरूलाई उक्त विधेयक तत्कालै फिर्ता लिने विश्वस्त पारेको उनको भनाइ थियो । ‘पार्टीका पदाधिकारीहरूले दिएको सुझावलाई सभापतिजीले गम्भीरतापूर्वक लिनु भएको छ । आज भोलिमा नै त्यो विधेयक फिर्ता होला,’ उनले भने ।   

पूर्ववर्ती सरकारले संवैधानिक परिषद्सम्बन्धी विधेयक ल्याउँदा तत्कालीन समयमा प्रमुख प्रतिपक्ष कांग्रेसले विरोध गरेको स्मरण गर्दै थापाले हिजो गलत भनिएको कुरा आज पनि गलत नै भएको जिकिर गरे ।  

प्रधानमन्त्री देउवाले गत बुधबार संवैधानिक परिषद् (काम, कर्तव्य, अधिकार र कार्यविधि) सम्बन्धी ऐन, २०६६ लाई संशोधन गर्न बनेको विधेयक राष्ट्रियसभामा पेश गरेका थिए । 

विधेयकमा ऐनको दफा ६ को उपदफा ३ मा अध्यक्ष र तत्काल बहाल रहेका कम्तीमा ५० प्रतिशत सदस्य उपस्थित भएमा परिषदको बैठकको लागि गणपूरक संख्या पुगेको मानिने उल्लेख  छ । 

यसअघि केपी शर्मा ओली नेतृत्वको सरकारले पनि पदमा बहाल पदाधिकारीमध्ये बहुमत पुग्ने पदाधिकारी उपस्थित भए गणपूरक संख्या मानिने व्यवस्था राखेर विधेयक पेश गरेको थियो । उक्त विधेयकविरुद्ध सभामुख अग्निप्रसाद सापकोटा रिट लिएर सर्वोच्च अदालत पुगेका थिए । सो सम्बन्धी मुद्दा सर्वोच्चमा विचाराधीन छ । 

संविधानमा प्रधानमन्त्रीको अध्यक्षतामा गठन हुने संवैधानिक परिषदमा प्रधानन्यायाधीश, प्रमुख प्रतिपक्षी दलको नेता, सभामुख, राष्ट्रियसभाका अध्यक्ष र उपसभामुख सदस्य रहने प्रावधान छ । हाल उपसभामुख पद रिक्त छ ।