१४ असार २०८३, आइतबार
रुसको सानो दल लिबरल डेमोक्रेटिक पार्टीले भ्लादिमिर पुटिनलाई राष्ट्रपति नभई शासक भनी सम्बोधन गर्न देशवासीलाई आह्वान गरेको छ ।
पुटिनको हैसियत र भूमिकाका लागि प्राभितेल वा शासक शब्द बढी उपयुक्त हुने उक्त दलको तर्क छ ।
संसद््को कुल ४५० सीटमध्ये उक्त दक्षिणपन्थी दलको २२ सीट छ । क्रेमलिनले आफ्ना क्रान्तिकारी विचार प्रस्ताव गर्न तथा तिनको लोकप्रियताको प्रमाण जुटाउन यस दललाई उपयोग गर्ने गर्छ ।
रुसमाथि पश्चिमले प्रतिबन्ध लगाएकाले अहिले रुसमा पश्चिमका उत्पादन, ब्रान्ड र नामहरूको विकल्प खोजिँदैछ ।
लिबरल पार्टीले राष्ट्रपति भन्ने पदवी अमेरिकाले १८औं शताब्दीमा बनाएको तर्क गर्दै त्यसको साटो प्राभितेल शब्द उपयुक्त रहेको बताएको छ ।
तर यो शब्दले निरंकुश शासकको झल्को दिने विपक्षीहरूको आरोप छ । अहिले नै पुटिनले जारको जस्तो निरंकुश शासन चलाइरहेको उनीहरू दाबी गर्छन् ।
प्राभितेल शब्दको रुसमा गहिरो र ऐतिहासिक महत्त्व छ । जारका रूपमा सन् १६१३ देखि १९१७ सम्म शासन चलाएको रोमानोभ परिवारले आफूलाई प्राभितेल भन्ने गर्थ्यो ।
सोभियत संघको पतन हुने बेलामा राष्ट्रपति शब्द प्रचलनमा ल्याइयो । मिखाइल गोर्भाचभलाई राष्ट्रपतिका रूपमा चिनाउने गरिएको थियो ।
सोभियत संघमा नेताहरूलाई कम्युनिस्ट पार्टीका अध्यक्ष वा महासचिव भनी चिनिन्थ्यो ।
