नेकपा (माओवादी केन्द्र)का सांसद सुरेशकुमार आलेमगरले पार्टी अध्यक्ष पुष्पकमल दाहाल ‘प्रचण्ड’को भारत भ्रमणमा प्रधानमन्त्री शेरबहादुर देउवापत्नी आरजु राणा देउवासँग भएको भेटबारे झूटा प्रचार गरिएको बताएका छन् । दुई नेताबीचको भेटका सन्दर्भमा झुठा प्रचार गरिएको भन्दै उनले आपत्ति जनाएका हुन् । 

राष्ट्रियसभाको सोमवारको बैठकमा सांसद आलेमगरले दाहाल–राणाबीचको भेटवार्ता सामान्य भेटवार्ता भएको दाबी गरे । उक्त भेटमा संघ र प्रदेशको निर्वाचनमा गठबन्धन गरेर जानेदेखि लिपुलेक, कालापानी र लिम्पियाधुरासहित समेटेर बनाइएको नक्सा खारेज गर्नेसम्मको सहमति भएको भन्दै झुटा प्रचार गरिएको उनको दाबी छ । 

भारतीय जनता पार्टीका विदेश विभाग प्रमुख विजय चौंथाईवालेको उपस्थितिमा भएको भेटमा यस्तो सहमति हुनै नसक्ने उनको जिकिर छ । ‘एउटा पार्टीको विदेश विभाग प्रमुखको उपस्थितिमा कमरेड प्रचण्ड–आरजु राणाजीको बैठकले त्यस्तो निर्णय गर्न सक्छ ? वाहियात कुरा । झुट कुरा,’ उनले भने । 

उनले नेकपा एमालेको वित्त तथा योजना आयोगमा सदस्य राखिएको एम अधिकारी को हो ? भनी प्रश्न पनि गरेका छन् । एमालेले भनेजस्तो एम अधिकारी  नेपाल राष्ट्र बैंकका गभर्नर महाप्रसाद अधिकारी नभए को हो त ? भन्ने प्रश्न गर्दै भनेका छन्, ‘हामीले मान्यौँ एम अधिकारी भन्ने अहिले राष्ट्र बैंकको गभर्नर हुनुहुन्न रहेछ, त्यो मानियो । त्यो को हो त ?’ 

उनले सिंगापुर प्रहरीमा गोर्खालीहरूलाई तलब–भत्तामा ठूलो विभेद हुने गरेको उल्लेख गर्दै त्यो समस्या तत्काल समाधान गर्न सरकारको ध्यानाकर्षण गराए ।