०२ साउन २०८३, शनिबार
राष्ट्रिय प्रजातन्त्र पार्टीका चार केन्द्रीय नेताले पार्टी परित्याग गरेका छन् । राप्रपाका केन्द्रीय नेताहरू दिलनाथ गिरी, श्याम तिमिल्सिना, केशवराज श्रेष्ठ र दिलविकास राजभण्डारीले मंगलवार पार्टी परित्याग गरेका हुन् ।
उनीहरूले मंगलवार प्रेस विज्ञप्ति जारी गर्दै राप्रपाको साधारण सदस्यसमेत नरहने गरी पार्टी परित्याग गरेका जनाएका छन् ।
राप्रपालाई मुलुकको बलियो राष्ट्रवादी प्रजातान्त्रिक शक्ति निर्माण गर्ने सोचका साथ अगाडि बढिरहेका बेला पार्टी नेतृत्वले अप्रजातान्त्रिक र निर्मम ढंगले तल्लोस्तरको लान्छाना लगाउँदै अपमानित गर्ने प्रयास गरेकाले पार्टी छाडेको उनीहरुले बताएका छन् ।
‘राप्रपाभित्र आन्तरिक प्रजातन्त्रको चीरहरण भएको अवस्थामा सर्वसत्तावाद र अहंकार मौलाएको, विधि विधानको धज्जी उडिरहेको अवस्थामा अपमानित र निरीह भएर पार्टीभित्र बस्नसक्ने अवस्था नभएका कारण आजैका मितिदेखि हामी साधारण सदस्यसमेत नरहने गरी पार्टीबाट अलग भएका छौँ,’ विज्ञप्तिमा भनिएको छ ।
मुलुकमा एउटा बलियो राष्ट्रवादी प्रजातान्त्रिक शक्तिको आवश्यकता झन् बढेर गएको भन्दै उनीहरुले यो अभियानमा भने निरन्तर क्रियाशील रहने प्रतिबद्धता जनाएका छन् ।
