२१ असार २०८३, आइतबार
नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले हालै सम्पन्न स्थानीय चुनावमा गाउँपालिकाको अध्यक्ष जित्न १० करोड रुपैयाँसम्म खर्च भएको रिपोर्ट आफूले पाएको बताएका छन् । तर, कुन दलका उम्मेदवारले १० करोड खर्च गरेको भने उनले खुलाएनन् ।
नरबहादुर कर्माचार्यको ९ औं स्मृति दिवसको अवसरमा आयोजित कार्यक्रममा प्रचण्डले धेरै पैसा खर्च गर्न र तिकडम नजाने चुनाव जित्न नसकिने बताएका हुन् ।
‘साथीहरुले गाउँपालिकाको चुनावमा १० करोड खर्च गरेर जितेको रिपोर्ट सुनाउनु भएको छ, बाफरे बाफ १० करोड,’ प्रचण्डले भने, ‘प्रदेश र संघको चुनावमा ५० औं करोड खर्च गर्ने भए, अरबतिर जाने भए ।’
प्रचण्डले अहिलेको निर्वाचन प्रणालीले देशलाई भड्खालोमा लैजाने खतरा रहेको दाबी गरे ।
‘शुरूमा क्रान्तिको रापताप हुँदा माओवादी भनेर उठाइदिएपछि चुनाव जित्ने पक्का जस्तै थियो । अब अहिले धेरै पैसा खर्च गर्न सकेन र तिकडम गर्न नसके चुनाव जितिन्न,’ प्रचण्डले भने ।
संविधान निर्माणको क्रममा आफूहरूले फरक मत राखेका कारण अहिले आलोचना गर्न पाउने उनले दाबी गरे ।
प्रचण्डले आसन्न निर्वाचनमा विचार र मुद्दा मिल्ने दलसँग तालमेल हुने बताए । ‘सकेसम्म विचार मिल्ने मुद्दा मिल्नेको बीचमा तालमेल गर्छाैं, गठबन्धनमा न्यायोचित ढंगले सबैलाई न्याय हुने ढंगले तालमेल हुने कुरा भएको छ,’ उनले भने ।
उनले चुनावी ब्याटल जित्नुपर्ने भन्दै तीन चार महिना विशेष ढंगले खटिन कार्यकर्तालाई निर्देशन दिए ।
