१९ असार २०८३, शुक्रबार
मंगलवार राति परेको भारी वर्षाका कारण भक्तपुरका विभिन्न क्षेत्रमा डुबान तथा कटान भएको छ ।
मनोहरा खोलाको डुबान र कटानका कारण ८० घरमा क्षति पुगेको जिल्ला प्रहरी परिसर भक्तपुरका प्रवक्ता डीएसपी राजु पाण्डेले जानकारी दिए ।
यस्तै सुकुम्बासी बस्तीका सबै घरटहरामा बाढी पसेको प्रहरीले जनाएको छ ।
चाँगुनारायण नगरपालिका वडा नं. ४ मनहरा खोला निलोपुल नजिक सुनसरीका हरी राईले सञ्चालन गरेको बंगुर फर्मबाट खोलाले ४ वटा बंगुर बगाएको छ ।
यस्तै चांगुनारायण नगरपालिका वडा नं. १ दुवाकोट बेसी मनहरा खोला किनारका २० वटा घर टहरामा पानी पसी १ वटा टहराको ४ जना मानिसलाई उद्धार गरी सुरक्षित स्थानमा सारिएको प्रहरीले जनाएको छ ।
यस्तै मध्यपुर ठिमी नगरपालिका वडा नं. २ मनहरा खोला किनार दिब्यश्वरी प्लानिङमा बस्ने अम्मर लामाको बंगुर फर्ममा पानी पसी डुबान भएकोमा फर्ममा रहेका ५०० वटा हाँस , २०० वटा बंगुर र २ वटा गाई उद्धार गरि सुरक्षित स्थानमा सारिएको छ ।
प्रहरीका अनुसार मध्यपुर ठिमी नगरपालिका वडा नं. १ मनहरा खोला किनारमा रहेको सुकुम्वासी बस्तीमा खोलाले कटान गरी माटोको ढिस्को खोलामा खस्दा खोलाको धार परिवर्तन भई ६० वटा घर टहरामा पानी पसेको छ ।
घटनामा मानवीय क्षति नभएको प्रहरीको भनाइ छ ।
यस्तै मध्यपुर ठिमी नगरपालिका वडा नं. २ सानोठिमी मनहरा खोला किनारमा जिल्ला सिन्धुली कमलामाई नगरपालिका वडा नं. ७ घर भई हाल सानोठिमी दिब्यश्वरी प्लानिङ स्थित टहरामा बसोबास गर्दै आएका ७० वर्षीया पेमा तामाङको टहरा भित्र रहेको २६ बोरा चामलमा पानी पसी क्षती भएको र ४५ वटा गिरीराज कुखुराको चल्ला बगाएको प्रहरीले जनाएको छ
