कैलालीको मोहन्याल गाउँपालिकाका अधिकृत दीपेन्द्र बुढाक्षेत्रीविरुद्ध अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दर्ता गरेको छ । उनीविरुद्ध ४४ हजार रुपैयाँ घुस लिएको अभियोगमा आइतवार मुद्दा दर्ता गरिएको अख्तियारका प्रवक्ता श्यामप्रसाद भण्डारीले जानकारी दिए । 

अधिकृत बुढाक्षेत्रीले सेवाग्राहीसँग ३० हजार रुपैयाँ घुस माग गरेको भन्ने सूचनाका आधारमा अख्तियारको टोलीले नियन्त्रणमा लिएको थियो । उनलाई घुस रकमसहित साउन १ गते अख्तियारको कन्चनपुर कार्यालयबाट खटिएको टोलीले नियन्त्रणमा लिएको थियो । 

अनुसन्धानका क्रममा उनले उक्त सेवाग्राहीसँग १४ हजार रुपैयाँ बैंक खातामा लिएका थिए । उनले लिएको कुल ४४ हजार रुपैयाँ बराबरको बिगो कायम गरी विशेष अदालतमा मुद्दा दर्ता गरिएको अख्तियारले जनाएको छ ।