०२ साउन २०८३, शनिबार
सर्लाहीको बरहथवा नगरपालिका–११ हिरापुर ब्यारेजस्थित सडकबाट स्रोत नखुलेको नगद ३६ लाख रूपैयाँ तथा २३३ ग्राम २८० मिलिग्राम तौल बराबरको सुनको सिक्री १ थान र ब्रास्लेट १ थानसहित २ जनालाई गएको सोमवार साँझ प्रहरीले पक्राउ गरेको थियो ।
डोटीको शिखर नगरपालिका–७ घर भई हाल काठमाडौं कपन बस्ने ३० वर्षीय हर्कबहादुर कठायत र भक्तपुर चाँगुनारायण नगरपालिका–२ दुवाकोट बस्ने ३१ वर्षीय विशाल खत्रीलाई पक्राउ गरी सार्वजनिक गरिएको हो ।
नयाँरोडबाट हिरापुरतर्फ जाँदै गरेको प्रदेश ०२– ०३३ प ७७५० नम्बरको मोटरसाइकलमा सवार व्यक्तिहरूलाई इलाका प्रहरी कार्यालय बरहथवाबाट खटिएको प्रहरीले जाँच गर्ने क्रममा उनीहरूको साथबाट नगद र सुन बरामद भएको प्रहरीको दाबी छ ।
यस्तै, रौतहट जिल्लाको ईशनाथ नगरपालिका– ६ स्थित चमनाका इलाकाबाट असार २२ गते सशस्त्र प्रहरीले १० लाख नेपाली रुपैयाँ र १२ हजार ५ सय भारतीय रुपैयाँसहित भारत घर बताउने २६ वर्षीय मोहम्मद कमरे आलमलाई पक्राउ गरेको थियो ।
बी आर ५ यू ५१६५ नम्बरको मोटरसाइकलमा सवार उनलाई सशस्त्र प्रहरी बल नेपाल बीओपी मपुरखापबाट खटिएको सशस्त्र प्रहरीको टोलीले शंका लागि जाँच गर्दा उनको साथमा फेला परेको उल्लेखित रुपैयाँको स्रोत नखुलेपछि पक्राउ गरिएको थियो ।
पक्राउ परेका आलमलाई बरामद रुपैयाँ तथा मोटरसाइकलसहित आवश्यक कारबाहीका लागि भन्सार कार्यालय गौरमा बुझाइएको थियो ।
यसैगरी प्रहरीले २०७८ पुस १७ गते सौर्य एयरलाइन्सकी कर्मचारीलाई स्रोत नखुलेको ५० लाखसहित पक्राउ गरेको थियो ।
प्रहरीले त्रिभुवन अन्तर्राष्ट्रिय विमानस्थलको आन्तरिक टर्मिनलबाट विराटनगर–४ की ३३ वर्षीया रेशा शाक्यलाई पक्राउ गरेको थियो । उनीसहित ३ जना कर्मचारीलाई आन्तरिक राजस्व अनुसन्धान कार्यालय बुझाइएको थियो ।
यस्तै, प्रहरीले काठमाडौं महानरपालिका–१८ नरदेवी एरियाबाट गैरकानूनी रूपमा हुण्डी कारोबार भएको सूचनाका आधारमा ७४ लाख रुपैयाँसहित ३ जनालाई पक्राउ गरेको थियो ।
प्रहरीले भारत राजस्थान शिखर जिल्ला, देवथला घर भई काठमाडौंको बबरमहल बस्ने ६४ वर्षीय राजु अग्रवाल, सिन्धुपाल्चोक मेलम्ची नगरपालिका– ४ का २० वर्षीय रामहरी दुलाल र रौतहटको चन्द्रपुर नगरपालिका– ४ का २४ वर्षीय सुदीप आचार्यलाई पक्राउ गरेको थियो । पक्राउपछि उनीहरूलाई पनि प्रहरीले राजस्व अनुसन्धान विभाग हरिहर भवन पठाएको थियो ।
पछिल्लो समय प्रहरीले स्रोत नखुलेको नगदसहित मानिसहरूलाई पक्राउ गरिरहेको छ । प्रहरी प्रधान कार्यालयको तथ्यांकअनुसार २०७८/७९ मा ११ करोड ५४ लाख ४४ हजार ६२४ नेपाली रुपैयाँ स्रोत नखुलेको पैसा बरामद गरेको छ भने ६६ जनालाई नियन्त्रणमा लिएको छ ।
काठमाडौं उपत्यकामा ८ करोड १० लाख ६९ हजार ७२० रुपैयाँसहित १६ जना, प्रदेश १ बाट ४४ लाख ७७ हजार ६७० रुपैयाँसहित ११ जना, मधेश प्रदेशबाट १ करोड ६५ लाख ७७ हजार ९ सय रुपैयाँसहित २७ जना, बागमती प्रदेशबाट १६ लाख ३२ हजार ९ सय रुपैयाँसहित २ जना, लुम्बिनी प्रदेशबाट ९५ लाख ३३ हजार १४ रुपैयाँसहित ८ जना र सुदूरपश्चिम प्रदेशबाट २१ लाख ५३ हजार ४२० रुपैयाँसहित २ जनालाई स्रोत नखुलेको पैसासहित नियन्त्रणमा लिएको प्रहरी हेडक्वार्टरको तथ्यांक छ ।
प्रहरी प्रवक्ता प्रहरी नायब महानिरीक्षक (डीआईजी) टेकप्रसाद राईले उपत्यकामा सुन व्यापारीहरूले स्रोत नखुलेको पैसा बोकेर हिँड्ने गरेको बताए ।
उनले उपत्यका बाहिर नाकामा व्यापार गर्ने व्यापारीहरूले स्रोत नखुलेको पैसा नेपाल ल्याउने गरेको बताए ।
‘उपत्यकामा सुन व्यापारीहरूले स्रोत नखुलेको पैसा बोक्ने गरेको पाइएको छ । यस्तै उपत्यका बाहिर नाकामा व्यापार गर्ने भारतीय र नेपाली व्यापारीहरूले स्रोत नखुलेको पैसा लिएर नेपाल आउने गरेको देखिएको छ,’ डीआईजी राईले लोकान्तरसँग भने ।
प्रवक्ता राईका अनुसार नाकामा नेपालबाट भारत सामान किन्न जाने व्यक्तिहरूले व्यापारीलाई दिएको पैसा नेपालमा लुकाएर साट्न ल्याउने गरेका छन् ।
उनीहरूले भारतमा त्यो पैसा नचल्ने भएकाले ठूलो परिणाममा नेपाल ल्याउने गरेको पाइएको डीआईजी राईले बताए ।
