२०७४ सालको निर्वाचनमा मोरङ क्षेत्र नम्बर ३ मा नेपाली कांग्रेसभन्दा बाम गठबन्धन झन्डै दोब्बर मतले अगाडि थियो । दोब्बर मत बढी भए पनि वाम गठबन्धन तर्फका उम्मेदवार भानुभक्त ढकालले भने जितका लागि निकै मेहनत गर्नु परेको थियो । 

भानुभक्त ढकालले ४२ हजार ४१३ मत ल्याएर विजयी बनेका थिए भने उनलाई कांग्रेसका उम्मेदवार सुनिलकुमार शर्माले ४० हजार ५०६ मतका साथ टक्कर दिएका थिए । यो क्षेत्रमा ढकाल नयाँ उम्मेदवार थिए । उनी प्रत्यक्षतर्फ पहिलोपटक चुनाव लडेका थिए । त्यसभन्दा अगाडि उनी समानुपातिक सांसद बनेका थिए । 

ढकालको गृह जिल्ला तेह्रथुम हो । २०७० मा एमाले तेह्रथुम जिल्ला कमिटीले समानुपातिकतर्फ दुई जनाको नाम सिफारिस गरेको थियो । जिल्लाबाट पूर्वसांसद तेजमान कन्दङ्वा र पूर्व जिल्ला विकास समिति सभापति किशोरचन्द्र दुलालको नाम सिफारिस गरेको थियो । तर, केन्द्रीय कमिटीमा आफै भएका ढकालले अध्यक्ष ओलीसँग राम्रो सम्बन्ध भएको फाइदा उठाउँदै उनी नाम थप्न सफल भए । र संविधानसभा सदस्यसमेत बने । 

२०७४ को निर्वाचनमा भने प्रत्यक्षतर्फ चुनाव लड्न ढकाल मोरङ आएका थिए । मोरङमा आएका उनलाई पाहुना उम्मेदवार भनेर प्रचार गरिएको थियो । प्रतिस्पर्धी कांग्रेसले मात्रै होइन आफ्नै पार्टी एमालेका नेता कार्यकर्ताले पनि ढकाललाई पाहुना उम्मेदवार भन्ने गरेका थिए ।

अघिल्लो पटकको चुनावजस्तै पाहुनाको आरोप नलागोस् भनेर ढकालले सुन्दरहरैचा घर बनाउन थालेका छन् । सुन्दरहरैचा १२ स्थित सुकुना क्याम्पस नजिकै उनले घर बनाइरहेका छन् । अघिल्लो पटक आउँदा उनले दाजुको घरमा बसेर चुनाव प्रचार–प्रसार गरेका थिए । 

२०७४ को मतदानमा आफूले आफैँलाई मतदान नगरी निर्वाचित हुने सांसदसमेत हुन् ढकाल । त्यसबेला उनको मतदाता नामावली तेह्रथुमको थियो । यसपटक भने उनले तेह्रथुमबाट सुन्दरहरैचा १२ मा मतदाता नामावलीसमेत सारेका छन् ।