मेक्सिकोको ग्वादालाहाराबाट अमेरिकाको लस एन्जलस गइरहेको भिभा एयरोबस विमानको इन्जिनमा आगो लागेपछि आकस्मिक अवतरण गरिएको छ । 

मंगलवार राति १० बजे टेकअफ गरेको केही मिनेटमै यात्रुहरूले ड्वांग आवाज सुनेका थिए । त्यसपछि उनीहरूले झिल्का आएको र दाहिने इन्जिनबाट आगोको लप्का झरेको देखे । आत्तिएका यात्रुहरूले विमान कर्मचारीलाई आगोको बारेमा बताएपछि पाइलटहरूले तत्कालै विमानलाई विमानस्थलमा उतारेका थिए । 

घटनाको भिडियो फूटेजमा रातिको समयमा विमानको इन्जिनबाट आगोका ठूला लप्का निस्केको देखिन्छ । 

घटनामा १८६ यात्रु र विमान कर्मचारी कसैलाई पनि चोटपटक लागेको छैन । तर आगो देखेपछि विमानभित्रका यात्रु रुने, चिच्याउने र प्रार्थना गर्ने गरेका थिए । 

भिभा एयरोबस कम मूल्यमा यात्रा गराउने र हरित विमान भएको दाबी गर्छ । मंगलवार उडेको एक घन्टामा विमान ग्वादालाहारा विमानस्थलमा फर्किएको थियो । त्यहाँबाट लस एन्जलस विमानस्थल पुग्न २ घन्टा ४० मिनेट लाग्छ । 

बुधवार बिहान उक्त एयरलाइन्सले यात्रुहरूलाई लस एन्जलसका लागि अतिरिक्त उडानको व्यवस्था गरेको थियो ।