२३ जेठ २०८३, शनिबार
अवैध रुपमा निर्माण गरिएका र स्वीकृत प्रयोजनविपरीत प्रयोग गरिएका संरचना खाली गराउने अभियान थालेको काठमाडौं महानगरपालिकाले सोमवार न्युरोड क्षेत्रमा अनुगमन गरेको छ ।
सोमवार महानगरपालिकाको टोलीले न्युरोड क्षेत्रका व्यवसायिक भवनहरूको अनुगमन गरेको हो । महानगरपालिकाको टोलीले सुरज आर्केड, विशालबजारलगायतका व्यवसायिक भवनको अनुगमन गरेको थियो ।
महानगरपालिकाको टोलीले सुरज आर्केडकाे बेसमेन्टमा राखिएका पसल हटाउन सोमवार अपराह्न ४ बजेसम्मको समय दिइएको छ । नगरप्रहरीको टोली ४ बजेसम्म बेसमेन्टमा रहेका पसल खाली गराउन निर्देशन दिएर फर्किएको थियो ।
पसल सञ्चालकहरूले दिउँसो ४ बजेसम्मको समय माग गरेपछि नगरप्रहरीको टोली फर्किएको हो ।
त्यस्तै, काठमाडौं महानगरपालिकाले विशाल बजार भवनका सञ्चालकलाई भवनको नक्सासहित २४ घण्टाभित्रमा वडा कार्यालयमा उपस्थित हुन निर्देशन दिएको छ । महानगरको टोलीले विशाल बजारको स्थलगत अनुमगन गर्दै बेसमेन्टमा रहेको पसलहरू अनधिकृत रहेको र भवनको नक्सा समेत नरहेको पाइएपछि तत्काल नक्सा लिएर वडा कार्यालयमा आउन निर्देशन दिएको हो ।
काठमाडौं महानगरपालिकाका मेयर बालेन्द्र साह (बालेन) अनधिकृत संरचना हटाउन आफैं फिल्डमा खटिएका थिए । उनी शनिवारदेखि नै फिल्डमा खटिएका छैनन् । नगर प्रहरीको नेतृत्वमा अवैध संरचना र प्रयोजनविपरीत प्रयोग गरिएका संरचनाको अनुगमन भने जारी छ ।
यसअघि सुन्धारास्थित काठमाडौं मल, न्युरोडकै आरबी कम्प्लेक्स, नयाँबानेश्वरको अल्फाबिटा कम्प्लेक्सलगायतमा मेयर बालेनले आफैं सहभागी भई अनधिकृत संरचना हटाएका थिए ।
