११ साउन २०८३, सोमबार
पूर्वराष्ट्रपति डा.रामवरण यादवले संघीय संसद्बाट पुनः पारित भई प्रमाणीकरणका लागि राष्ट्रपति समक्ष पठाइएको नागरिकतासम्बन्धी विधेयकले यथाशीघ्र निकास पाउनेमा आफू विश्वस्त गरेको बताएका छन् ।
सञ्चारकर्मीसँगको कुराकानीमा उनले भने, ‘संविधानको अधिकार र परिधिभित्र रही राष्ट्रपतिबाट नागरिकता विधेयकलाई स्वीकार गरी यथाशीघ्र निकास दिनु नै उत्तम हुन्छ । यसरी नै यस विषयले निकास पाउँछ भन्नेमा म विश्वस्त छु ।’
राष्ट्रपतिले मर्यादा र सीमा बाहिर गएर कुनै काम गर्नेमा आफूलाई विश्वास नै नलागेको डा. यादवले बताए । ‘राष्ट्रपतिको मर्यादा र सीमा संविधानले तोकिदिएको छ । संसारको परम्परा पनि हेर्नुपर्छ । राष्ट्रपतिले विधेयक स्वीकार गरी प्रमाणीकरण गर्नुहुन्छ भन्ने मलाई विश्वास छ । हामीले सबैलाई समेटेर लैजानुपर्छ’, उनले भने ।
नेपाली जनताको ठूलो संघर्ष र बलिदानको उपलब्धीका रूपमा प्राप्त संविधानको कार्यान्वयनलाई सहज सुचारु बनाएर खँदिलो तुल्याउँदै लैजानुपर्छ भन्दै पूर्वराष्ट्रपति डा. यादवले कुनै विषयमा अलमल भएमा विषयविज्ञ, संविधान र कानुनविद्सँग गरिएको परामर्शका आधारमा अघि बढ्न सकिने आफ्नो अनुभव सुनाए । ‘राष्ट्रपति, सरकार, संसद् र राजनीतिक दल संविधानले दिएको अधिकार र परिधिभन्दा बाहिर नजाऔँ, संविधानलाई सहजरुपमा सुचारु हुने काम गरौँ’, उनले भने ।
विषयविज्ञभन्दा बाहिरका व्यक्तिसँग हुने छलफल र परामर्शले शंका–उपशंका पैदा पूर्वराष्ट्रपति यादवको भनाइ थियो । ‘त्यसैले सबैले संविधानले दिएको अधिकार प्रयोग गरेर यसैको परिधिभित्र रहेर काम गरौँ, समस्या समाधानको यो नै उत्तम उपाय हो’, उनले भने ।
नेपालको नागरिकता ऐन, २०६३ लाई संशोधन गर्न बनेको विधेयक संघीय संसद्का दुवै सदनबाट दोस्रो पटक पारित भई प्रमाणीकरणका लागि अहिले राष्ट्रपति समक्ष पुगेको छ ।
प्रतिनिधिसभाको गत साउन ६ गतेको बैठकबाट पारित गरी सभामुखबाट प्रमाणित भई प्रमाणीकरणका लागि राष्ट्रपतिसमक्ष पेश भएको नागरिकतासम्बन्धी विधेयक गत साउन २९ गते सन्देशसहित राष्ट्रपति कार्यालयबाट अध्ययन, छलफल, विमर्श र विश्लेषणसहित पुनर्विचार गरियोस् भनी सदनमा फिर्ता पठाइएको थियो ।
सन्देशसहित फिर्ता आएको विधेयकलाई प्रतिनिधि सभा, राष्ट्रियसभा र विधायन समितिमा आवश्यक छलफलपछि जस्ताको तस्तै पुनः पारित गरी राष्ट्रपतिसमक्ष प्रमाणीकरणका लागि पठाइएको हो । रासस
