अमेरिकाबाट निरन्तर आर्थिक तथा सैन्य सहयोग प्राप्त नगरेमा युक्रेन रुसविरुद्धको युद्धमा पराजित हुने युक्रेनका राष्ट्रपति भोलोदीमीर जेलेन्स्कीले बताएका छन् । 

सीएनएनका फरीद जकारियासँग कुरा गर्दै जेलेन्स्कीले भने, ‘म राष्ट्रपति जो बाइडन र ह्वाइट हाउसप्रति कृतज्ञ छु । यो सहयोगविना हामी गुमेको भूमि फिर्ता लिन सक्दैनौं ।’

नोभेम्बर महिनामा हुने मध्यावधि निर्वाचनमा रिपब्लिकनहरू विजयी भएमा युक्रेनलाई दिने सहयोग बन्द हुन सक्ने जकारियाले बताए । त्यसको उत्तर दिँदै जेलेन्स्कीले दुवै दलबाट युक्रेनलाई दह्रो सहयोग जारी रहने विश्वास गरेको बताए । 

पश्चिमले किएभलाई हतियार र पैसा नदिएमा रुसले युद्ध जित्न सक्ने जेलेन्स्कीको भनाइ छ । अमेरिकाका करदाताहरूको पैसा पश्चिमी मूल्यमान्यताको रक्षाका लागि खर्च भइरहेको उनले दाबी गरे । 

अमेरिकाले युक्रेनलाई अहिलेसम्म सैन्य सहायताका रूपमा ३० अर्ब डलर दिइसकेको छ । त्यसमध्ये १७ अर्ब डलर सन् २०१४ देखि गत फेब्रुअरी महिनासम्म दिएको हो । 

त्यसबाहेक अमेरिकाले युक्रेनी सेनालाई गुप्तचर सूचना समेत उपलब्ध गराउँदै आएको छ ।