नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले सत्ता गठबन्धनमा सिट बाँडफाँटको छलफल अन्तिम चरणमा पुगेको बताएका छन् । प्रधानमन्त्री निवास बालुवाटारमा शुक्रवार बस्ने बैठकले सहमतिको प्रयास गर्ने उनले बताए । 

अखिल नेपाल किसान संघको कार्यक्रमलाई शुक्रवार सम्बोधन गर्दै प्रचण्डले बाँडफाँटको छलफल अन्तिम चरणमा पुगेको बताएका हुन् । ‘अहिले पनि बालुवाटारमा शीर्ष नेतृत्वसहितको बैठक छ । १ बजे त्यहाँ पुग्नै पर्ने हो । यस्तै कार्यक्रमको व्यस्तताले समयमा पुग्न पाइँदैन, जसले गर्दा थोरै आलोचना हुने भयो’, सवा १ बजेको समयमा कार्यक्रमलाई सम्बोधन गर्दै प्रचण्डले भने । 

बैठकमा सहभागी हुन भन्दै प्रचण्ड भाषण छोट्याएर बालुवाटारतिर लागेका छन् ।

मंसिर ४ गते हुने प्रतिनिधि सभा निर्वाचनका लागि सिट बाँडफाँटका लागि भइरहेको छलफलमा १ सय ६५ मध्ये १ सय ३० सिटमा सहमति भएको नेताहरूले दाबी गरेका छन् । मंसिर ४ गतेको चुनावको लागि असोज २३ गते उम्मेदवार मनोनयन हुँदैछ ।