३० असार २०८३, मंगलबार
सत्तारूढ पाँच दलीय गठबन्धनको बैठक प्रधानमन्त्री निवास बालुवाटारमा बसिरहेको छ । आज (सोमवार) बिहानैदेखि गठबन्धनका नेताहरू सिट बाँडफाँटको छलफलमा जुटेका हुन् । नेताहरूले आजै बाँडफाँट टुंगो लगाएर सहमति पत्रमा हस्ताक्षर गर्ने तयारी गरेको गठबन्धनमा रहेका दलमध्येका एक शीर्ष नेताले जानकारी दिए ।
प्रधानमन्त्री निवास बालुवाटारमा बिहानैदेखि बैठक बसेको भए पनि दिउँसो केहीबेर नेताहरू खाना खानका लागि छुट्टिएका थिए । त्यसपछि, दिउँसो करिब साढे १ बजे जुटेका नेताहरूले छलफल जारी राखेका छन् ।
‘सिट र निर्वाचन क्षेत्रको बाँडफाँट प्याकेजमा टुंगो लगाएर आजै सहमति पत्रमा हस्ताक्षर गर्ने तयारी छ’, ती नेताले भने ।
गठबन्धनमा सिट बाँडफाँटको सहमतिको प्रारम्भिक खाका तयार भएपनि केही क्षेत्रमा रहेको दोहोरो दाबीमा छलफल केन्द्रित रहेको बालुवाटार स्रोतले बताएको छ । सिट बाँडफाँटको विषयलाई लिएर गठबन्धनभित्र रहेका दलका असन्तुष्टिलाई पनि सकेसम्म सम्बोधन गर्ने प्रयास भइरहेको बालुवाटार स्रोतको भनाइ छ ।
सिट बाँडफाँटमा असन्तुष्ट रहेर गठबन्धनबाट बाहिरिने बताएको जनता समाजवादी पार्टी (जसपा)का अध्यक्ष उपेन्द्र यादव पनि बिहानैदेखि बालुवाटार बैठकमा सहभागी छन् ।
नेताहरूले यसअघि मोटा–मोटी रूपमा मिलाएको सिट बाँडफाँटको संख्यामा पनि पछिल्लो छलफलबाट सामान्य हेरफेर भएको बताइएको छ ।
आइतवार बसेको गठबन्धनको बैठकमा प्रधानमन्त्री शेरबहादुर देउवा, माओवादी केन्द्रका अध्यक्ष पुष्पकमल दाहाल ‘प्रचण्ड’ र एकीकृत समाजवादीका अध्यक्ष माधव नेपालले जसपा अध्यक्ष उपेन्द्र यादवलाई फकाउने प्रयास गरेका थिए ।
नेताहरूले फकाएपछि यादव गठबन्धनको बैठकमा सहभागी भएका छन् ।
असोज २३ गते प्रत्यक्षतर्फका उम्मेदवारहरूको मनोनयन गर्नुपर्ने निर्वाचन तालिका छ ।
गठबन्धनमा सिट बाँडफाँट टुंगो लगाएर दलहरूले आ–आफ्नो दलको उम्मेदवार पनि छान्नुपर्ने छ । त्यसकारण पनि आज ढिलो गरी भए पनि सिट बाँडफाँट टुंगो लगाउने गठबन्धनका नेताहरूले बताएका छन् ।
