नवरात्र अर्थात् बडादशैंको नवौं दिन देशभरका देवी मन्दिरमा झरीका वास्ता नगरी भक्तजनको बिहानैदेखि भीड लागेको छ ।

दुर्गा पक्ष समेत भनिने यस अवसरमा नवरात्रको अन्तिम दिन परेकाले पनि मंगलवार बिहानैदेखि झरीको परवाह नगरी देशभरका शक्तिपीठमा भक्तजनको भीड लागेको हो । 

नवरात्रको अन्तिम दिन मंगलवार बिहानैदेखि राजधानीलगायत देशभर वर्षा भइरहेको छ । शक्तिपीठ र देवी मन्दिर वरिपरिका सडकमा सवारीसाधनको पनि चाप देखिन्छ । ती स्थानमा पार्किङ गरिएका सवारीसाधनको पनि लाम भेटिन्छ । अन्यत्र भने सडक खुला छ ।

महानवमीको दिन भएकाले मंगलवार धेरैैले सवारीसाधनमा पूजा आराधना गरी घरमै थन्क्याएका कारण पनि सडक सुनसान छ । 

अघिपछि सडक जाममा पर्ने यात्रु अहिले भने खुला वातावरणमा यात्रा गर्न पाउने अवस्था छ । सवारीसाधन कम भएपछि राजधानीको वातावरणमा धुवाँ धुलोको मात्रा कम छ । राजधानीका गुह्येश्वरी, जयवागेश्वरी, मैतीदेवी, कालिकास्थान, नक्साल भगवती, भद्रकाली, शोभाभगवती, विजेश्वरी, कंकेश्वरी, इन्द्रायणी, रक्तकाली, श्वेतकाली, दक्षिणकाली, चामुण्डामाई, सुन्दरीमाई, बज्रयोगिनी, बज्रबाराही, बगलामुखी लगायत मन्दिरमा भक्तजनको भीड छ । मंगलवार पनि महाअष्टमीमा जस्तै बलिसहित पूजा आराधना गर्ने भक्तजनको घुइँचो लागेको छ ।

राजधानीका प्रत्येक शक्तिपीठमा मंगलवार हजारौंको संख्यामा भक्तजन लामबद्ध छन् । 

वर्षमा १ दिन मात्र खुल्ने हनुमानढोका दरबारको तलेजु भवानी मन्दिरमा पनि बिहानैदेखि हजारौं भक्तजन लाममा बसेका छन् । घटस्थापनाका दिन राखेकोे जमरा मंगलवार शक्तिपीठमा लगी चढाउने चलन छ । यसैगरी वर्षमा १ दिन मात्र खुल्ने गोकर्ण राजनिकुञ्जभित्रको वनदेवी मन्दिरमा पनि बिहानैदेखि हजारौं भक्तजन लाममा बसेका छन् । 

नेपाल ट्रष्टको कार्यालय अन्तर्गतको गोकर्ण वनमा रहेको यो वनदेवी मन्दिर प्रत्येक शारदीय नवरात्रको महाअष्टमी र महानवमीका दिन मात्र खुल्ने गर्छ ।

उपत्यका बाहिरका देवी मन्दिरमा पनि भक्तजनको घुइँचो छ । पाथीभरा, छिन्नमस्ता, गहवामाई, पलाञ्चोक भगवती, पाल्चोक भगवती, नाला भगवती, चण्डेश्वरी, मनकामना, इच्छाकामना, विन्ध्यवासिनी, बाग्लुङ कालिका, शैलेश्वरी, उग्रतारा, बडीमालिका लगायत मन्दिरमा भक्तजनको भीड लागेको बताइएको छ । 

नवरात्रसमेत भनिने यस अवसरमा शक्तिपीठमा दर्शन गरेमा मनोकामना पूरा हुने धार्मिक विश्वास छ । विगत २ वर्ष कोरोना महामारीका कारण शक्तिपीठ बन्द गरी घर घरमै दुर्गा देवीको पूजा आराधना गर्न आह्वान गरिएको थियो । यस वर्ष भने कोरोनाको जोखिम कम भए पनि डेंगुको त्रास बढेको छ ।

यस वर्ष डेंगुबाट सुरक्षित भएर दशैं मनाउन प्रशासनले आह्वान गरेको छ । वर्षा निरन्तर भइरहकाले पनि यस्ता रोगबाट बचेर पर्व मनाउन आह्वान गरिएकोे छ ।