सिरहामा सशस्त्र प्रहरी बलका जवानले आफ्नै सिनियर अधिकृतको हत्या गरेको खुलासा भएको छ । छिन्नमस्ता बीओपीमा कार्यरत प्रहरी सहायक निरीक्षक (असई) सत्यनारायण यादवको उक्त बीओपीमै कार्यरत जवान होमबहादुर खत्रीले हत्या गरेको अभियोगमा पक्राउ परेपछि यस्तो खुलासा भएको हो । 

सशस्त्र स्रोतका अनुसार यादवको जवान खत्रीले भारतीय युवती प्रयोग गरेर हत्या गरेको देखिएको छ । ‘के र किन हत्या गरे भन्ने अहिलेसम्म खुलेको छैन । तर हत्यामा संलग्न भएको देखिएकाले उनी पक्राउ परेका हुन्’, सशस्त्रका एक अधिकारीले लोकान्तरलाई बताए । 

भगवानपुर गाउँपालिका–२ का असई यादव दशैंमा बिदामा घर गएका थिए । दशैंको अर्को दिन छिन्नमस्ता आउट बोर्डर पोष्ट (बीओपी) डियुटीमा फर्किएका यादवको शव सीमाबाट केही पर भारतीय भूमिमा फेला परेको थियो । 
नग्न अवस्थामा खोलामा फेला परेको शव सशस्त्र प्रहरी कर्मचारी भएको पुष्टि भएपछि प्रकृया पुरा गरेर नेपाल ल्याइएको थियो ।

यो घटना भएपछि नैतिक जिम्मेवारी लिनुपर्ने भन्दै राजविराज गणका प्रमुख सशस्त्र प्रहरी उपरीक्षक (एसपी) प्रदीप खड्कालाई जिम्मेवारीबाट हटाइएको सशस्त्र प्रहरी बलले जनाएको छ । 
‘घटना भएपछि गणका प्रमुखलाई जिम्मेवारीबाट हटाइएको छ, सशस्त्र प्रहरीका सहायक प्रवक्ता डीएसपी शैलेन्द्र थापाले भने, ‘सत्यतथ्य बुझ्नका लागि सशस्त्र प्रहरी अतिरिक्त महानिरीक्षक (एआईजी)को नेतृत्वमा समिति गठन भएको छ । 

सशस्त्र प्रहरीले एआईजी चन्द्र प्रकाश गौतमको नेतृत्वमा ३ सदस्यीय समिति गठन गरेको सहायक प्रवक्ता थापाले बताए । उनका अनुसार समितिले घटनाको सत्यतथ्य अनुसन्धान गरेर प्रतिवेदन तयार पार्नेछ भने नेपाल प्रहरीलाई घटनाको अनुसन्धानका लागि सहयोग पनि गर्ने छ ।

प्रहरीका अनुसार मादक पदार्थ सेवन गरेर विवाद हुँदा हत्या भएको हुनसक्ने प्रारम्भिक अनुसन्धानमा देखिएको छ । अनुसन्धानमा खटिएका एक प्रहरी अधिकारीका अनुसार असई यादवको घाँटीमा डोरीले कसेको डाम र टाउकोमा चोट लागेको छ ।