अमेरिकाको एबीसी न्युजका खोजी पत्रकार जेम्स गोर्डन मीकको घरमा एफबीआईले गत अप्रिल महिनामा छापा मारेदेखि उनी सार्वजनिक स्थानमा देखिएका छैनन् । 

बाइडन प्रशासनको परराष्ट्रनीतिका कटु आलोचक मीकको आर्लिङटनमा रहेको घरमा एफबीआईले छापा मारेपछि त्यो रित्तो छ । यी ५२ वर्षीय पत्रकारलाई कुनै पनि अभियोग लगाइएको छैन । 

छापा मारिएलगत्तै गोर्डनले एबीसी न्युजबाट राजीनामा दिएका थिए । 

रोलिङ स्टोन पत्रिकाले सबभन्दा शुरूमा यो समाचार ब्रेक गरेको थियो । उक्त पत्रिकाले एबीसीका एक प्रतिनिधिसँग कुरा गर्दा उनले भने, ‘मीकले एक्कासि राजीनामा दिए अपन हामीकहाँ काम गर्न छोडेको महिनौं भयो ।’

गोर्डनका एक पूर्वसहकर्मीले पनि उनी धर्तीबाटै गायब भएको बताए । उनी कहाँ छन् कसैलाई पनि थाहा छैन । 

मीकले सेनाका सेवानिवृत्त लेफ्टिनेन्ट कर्नेल स्कट मानसँग मिलेर एउटा पुस्तक लेखिरहेका थिए । त्यस पुस्तकबाट पनि उनले नाम झिकेका छन् । 

मानले भने, ‘उनले मलाई गत वसन्तमा सम्पर्क गरेका थिए । उनी निकै चिन्तित देखिन्थे । व्यक्तिगत कारणले गर्दा आफू पुस्तक लेखन परियोजनाबाट पछि हटेको उनले बताएका थिए ।’

एफबीआईले आफू अप्रिल २७ को बिहान आर्लिङटनस्थित मीकको घरमा पुगेको पुष्टि गरेको छ । तर अनुसन्धान चलिरहेकाले त्यसमा थप टिप्पणी नगर्ने उसको भनाइ छ । 

मीकको ल्यापटपमा गोप्य सामग्री फेला परेको रोलिङ स्टोनलाई स्रोतहरूले बताए । त्यही सामग्रीका कारण कतै बाइडन प्रशासनले उनलाई बेपत्ता बनाएको त हैन भनी प्रश्न उठाइएका छन् ।