१३ असार २०८३, शनिबार
हुण्डी कारोबारमा संलग्न रहेको आरोपमा प्रहरीले काठमाडौंबाट दुई भारतीयसहित तीन जनालाई नियन्त्रणमा लिएको छ । काठमाडौंस्थित न्युरोड विशालबजार एरियामा केही व्यक्तिहरूले राष्ट्र बैंकले जारी गरेको निर्देशनविपरीत हुण्डी कारोबार गर्दै आएको सूचनाका आधारमा अनुसन्धान थालेको प्रहरीले उनीहरूलाई बुधवार नियन्त्रणमा लिएको हो ।
पक्राउ पर्नेमा भारतीय नागरिकहरू वर्ष ५५ का किशन गोपाल, वर्ष ५० का कमलकान्त कुल्थिया र काठमाडौं नक्साल बस्ने, वर्ष ६७ का निर्मलकुमार अग्रवाल रहेका छन् । प्रहरीले उनीहरूको साथबाट ३१ लाख ८१ हजार ३८५ रुपैयाँ बरामद गरेको छ । त्यस्तै विभिन्न व्यक्ति तथा संस्थाको नाममा काटिएको चेक पनि बरामद भएको प्रहरीले जनाएको छ ।
प्रहरीका अनुसार उनीहरूले विशालबजारमा रहेको अनुज सेन्टर र न्युरोड खिचापोखरीमा रहेको जयदुर्गा ट्रेड इन्टरनेशनलबाट कारोबार गर्दै आएका थिए । पक्राउ परेका उनीहरूलाई आवश्यक अनुसन्धान कार्यका लागि जिल्ला प्रहरी परिसर टेकु पठाइएको छ ।
