०२ असार २०८३, मंगलबार
मुस्ताङबाट २९ वर्षीय योगेश गौचन थकाली प्रतिनिधिसभा सदस्यमा निर्वाचित भएका छन् । उनी पूर्वमन्त्री एवं कांग्रेस मुस्ताङका सभापति रोमी गौचन थकालीका छोरा हुन् ।
पूर्व वाणिज्य मन्त्रीसमेत रहेका रोमीले २०५६ र २०७० सालमा चुनाव जितेका थिए । २०६४ र २०७४ को चुनावमा भने पराजित भए ।
यस वर्षको प्रतिनिधिसभा निर्वाचनमा पनि नेपाली कांग्रेसले मुस्ताङको टिकट रोमीलाई नै दिने तयारी गरेको थियो ।
तर, उनले चुनावी प्रतिस्पर्धामा आफ्नै २९ वर्षीय छोरा योगेशलाई अगाडि सारे ।
रोमीका छोरा योगेशले २०७९ को प्रतिनिधिसभा चुनावमा नेपाली कांग्रेसका तर्फबाट जीतको खाता खोलेका छन् ।
उनी टिकट पाउनेबित्तिकै कांग्रेसका कान्छा उम्मेदवार भन्दै चर्चामा आएका थिए ।
आज उनै कान्छा उम्मेदवार योगेश मुस्ताङबाट विजयी भएका छन् । उनी निवर्तमान सांसद तथा नेकपा एमालेका केन्द्रीय सदस्य प्रेमप्रसाद तुलाचनलाई ९१४ मतान्तरले पछि पार्दै सांसद बनेका हुन् ।
मुख्य निर्वाचन अधिकृत ईश्वर पराजुलीले गौचनले तीन हजार ९९२ र एमालेका तुलाचनले तीन हजार ७८ मत प्राप्त गरेका जानकारी दिए ।
राष्ट्रिय स्वतन्त्र पार्टीका सुदेश गुरुङले ८७ र राष्ट्रिय प्रजातन्त्र पार्टीका प्रवीणकुमार शेरचनले १३ मत प्राप्त गरेका छन् ।
आइतबार भएको चुनावमा १० हजार ९५७ मतदातामध्ये सात हजार २३० अर्थात् ६५.९८ प्रतिशत मत खसेको थियो । गौचन मुस्ताङको थासाङ गाउँपालिका– ३ लेतेका बासिन्दा हुन् ।
विद्यार्थी राजनीतिबाट आएका योगेश अहिले नेपाली कांग्रेसको गण्डकी प्रदेश समिति सदस्य तथा कार्यसम्पादन समितिमा छन् ।
भारतबाट ब्याचलर अफ बिजनेस म्यानेजमेन्ट सकेर फर्किएका योगेश पछिल्लो समय राजनीति र व्यापारमा सक्रिय छन् ।
कांग्रेस नेता रोमी गौचन थकालीले प्रत्यक्षमा छोरालाई उम्मेदवार बनाएपछि नेपाली कांग्रेसले जनजातितर्फको समानुपातिक सूचीको ३५ नम्बरमा उनको नाम सिफारिस गरेको थियो ।
तर, उनले समानुपातिक सूचीबाट पनि आफ्नो नाम फिर्ता लिइसकेका छन् ।
