२२ जेठ २०८३, शुक्रबार
मंसिर–४ मा भएको प्रदेशसभा तथा प्रतिनिधिसभा सदस्य निर्वाचनको मतगणना शुरू भइरहेको छ । निर्वाचन स्थगित भएका क्षेत्रबाहेक अन्यत्र धमाधम मतगणना शुरू हुन थालेका छन् ।
निर्वाचन आयोगले आइतबार राती ९ बजेबाट नै मतगणना शुरू हुने बताएको भए पनि आयोगले आइतबार दिउँसो जारी गरेको निर्देशनको कारण तोकिएको समयमा मतगणना शुरू हुन सकेको थिएन ।
आयोगले प्रत्यक्ष र समानुपातिकतर्फको मत सँगसँगै गणना गर्न निर्देशन दिएपछि गणना ढिलोगरी शुरू भएको थियो ।
तर, सोमबार दिउँसोसम्म ठूला दलका शीर्ष नेताहरू उम्मेदवार रहेको निर्वाचन क्षेत्रको मतगणना भने शुरू हुन सकेको छैन् ।
नेकपा एमालेका अध्यक्ष केपी शर्मा ओली उम्मेदवार रहेको झापा–५ मा पनि मतगणना शुरू हुन सकेन् ।
नेपाली कांग्रेसका सभापति एवं प्रधानमन्त्री शेरबहादुर देउवा उम्मेदवार रहेको डडेल्धुरामा पनि अझै मतगणना शुरू हुन सकेको छैन् ।
माओवादी केन्द्रका अध्यक्ष पुष्पकमल दाहाल प्रचण्ड उम्मेदवार भएको गोरखा क्षेत्र नम्बर–२ को पनि मतगणना शुरू भएको छैन् ।
नेकपा एकीकृत समाजवादीका अध्यक्ष माधव नेपाल उम्मेदवार रहेको रौतहटको क्षेत्र नम्बर–१ मा पनि अझै मतगणना शुरू भएको छैन् । रौतहट–१ मतमपेटिका संकलनको लागि तुलनात्मकरूपमा सहज मानिन्छ ।
रौतहटका मुख्य निर्वाचन अधिकृत मातृकाप्रसाद मरासिनिले दिउँसो २ बजेबाट मात्रै मतगणना गर्ने गरी सर्वदलीय बैठकमा निर्णय भएको बताए ।
