प्रधानमन्त्री शेरबहादुर देउवाले शान्तिपूर्वक निर्वाचन गराउन सफल भएको भन्दै सुरक्षा निकायका प्रमुखलाई बोलाएर धन्यवाद दिएका छन् । सोमबार बेलुका प्रधानमन्त्री निवास बालुवाटारमा नेपाल प्रहरीका प्रहरी महानिरीक्षक (आईजीपी) धिरजप्रताप सिंह र सशस्त्र प्रहरी बलका प्रमुख आईजीपी राजु अर्याललाई बोलाएर धन्यवाद दिएका हुन् । 

निर्वाचनका क्रममा केहीबाहेक अन्य ठाउँमा शान्ति सुरक्षामा महत्वपूर्ण योगदान गरेको भन्दै धन्यवाद दिएको बालुवाटारले जनाएको छ । देउवाले निर्वाचन प्रभावित र मतगणना रोकिएका बाजुरा, दोलखा, स्याङ्जा लगायतका क्षेत्रको बारेमा सुरक्षाका निकायका प्रमुखसँग ब्रिफिङ समेत लिएको स्रोतले बतायो ।

‘प्रहरी र सशस्त्रका आईजीपीहरुलाई निर्वाचन रोकिएको क्षेत्रको बारेमा जिज्ञासा राख्नु भएको थियो । उहाँले त्यहाँको अवस्थाको बारेमा जानकारी गराउनु भएको छ,’ स्रोतले लोकान्तरसँग भन्यो । प्रहरीका आईजीपी सिंह र सशस्त्रका आईजीपी अर्यालले निर्वाचनमा समस्या देखिएका क्षेत्र र मत गणना हुँदा हुँदै रोकिएको क्षेत्रको बारेमा जानकारी गराएका थिए । प्रधानमन्त्री देउवाले बाजुरामा भएको घटनामा संलग्न सबैलाई पक्राउ गरेर कानुनी दायरामा ल्याउन समेत निर्देशन दिएका छन् ।