उत्तर कोरियामा दुईजना किशोरलाई दक्षिण कोरियाको फिल्म हेरेको र बेचेको आरोपमा गोली हानी हत्या गरिएको द डेली मेल पत्रिकाले खबर दिएको छ । 

उनीहरूलाई चीन सीमा नजिक रहेको ह्येसान शहरमा एक एयरफील्डमा सामूहिक गोलीको शिकार बनाइएको हो । मृत्युदण्ड गत अक्टोबर महिनामै दिइएको भए पनि त्यसको खबर बल्ल आएर सार्वजनिक भएको हो । 

आफ्नी सौतेनी आमाको हत्या गर्ने अर्का एक किशोरलाई पनि त्यही अवसरमा मृत्युदण्ड दिइएको छ ।

मृत्युदण्ड हेर्नका लागि बाध्य बनाइएका दुईजनाले रेडियो फ्री एसियालाई यसको बारेमा पुष्टि गरेका हुन् । 

उत्तर कोरियामा पश्चिमा झलक आउने सबै किसिमका सामग्रीमा कठोर प्रतिबन्ध लगाइएको छ । 

उत्तरका सर्वोच्च नेता किम जोङ उनले दक्षिण कोरियालाई अमेरिकी कठपुतली मान्ने गरेका छन् । दक्षिणबाट आउने कुनै पनि सामग्रीलाई उत्तरले संवेदनशील मान्ने गरेको छ । 

तर प्रतिबन्धका बावजूद दक्षिण कोरियाली फिल्म र सिरिजहरू गोप्य रूपमा पेन ड्राइभमा राखेर उत्तर ल्याइने गरेको छ ।