२४ जेठ २०८३, आइतबार
खाद्य व्यवस्था तथा व्यापार कम्पनी लिमिटेड वीरगञ्ज कार्यालयले मंसिर महिनाको अन्तिमदेखि किसानका धान खरिद गर्ने जनाएको छ । लिमिटेड वीरगञ्ज कार्यालयका सूचना अधिकारी समीर दाहालले धान खरिदका लागि आफूहरु तयारी अवस्थामा रहेको बताए ।
लिमिटेड वीरगञ्ज कार्यालय प्रमुख विकास कटुवालले सरकारले समर्थन मुल्य तोक्न ढिलाइ गरेकाले धान खरिदमा पनि केही ढिला हुन गएको बताए । हालसम्म बजेट र निर्देशन दुबै आइनपुगेकाले धान खरिदमा ढिलाई भएको उनले प्रष्ट पारे ।
सरकारले कृषकको धान समयमै खरिद नगर्दा किसानहरु सस्तोमा धान बेच्न बाध्य भएका छन् । किसानले उत्पादित धान अहिले बिचौलियाले खरिद गरेर स्टक राख्नेगरेका छन् । सरकारले सोना मन्सुली धानको समर्थन मूल्य प्रतिक्विन्टल ३१ सय ५० रुपियाँ तोकेको छ । तर किसानहरुले २४ सय रुपियाँमा विचौलियालाई बेचिरहेका छन् ।
लिमिटेडले अन्यत्र विचौलियालाई धान नबेच्न किसानहरुलाई आग्रह गरेको छ । २५ क्वीन्टल सम्म धान ल्याउने कृषकको २ दिनभित्र धान खरिद गरिदिने लिमिटेडले गरेको छ । गँहुखेतीका लागि जोताइ, मल बिऊ किन्नका लागि किसाहरुले धान बेच्नुपर्ने बाध्यता रहेको बताएका छन् । लिमिटेडले समयमै धान खरिद नगर्दा किसान मारमा परेको स्थानीय किसान बल्हिया यादवले बताए ।
