नाडाको संस्थागत सदस्य जानकी अटोमोवाइल्स एशोसिएशन अफ नेपालले धनुषाको ढल्केवरमा नेपाल राष्ट्र बैंकको नीतिविरुद्ध प्रदर्शन गरेको छ । राष्ट्र बैंकको कसिलो मौद्रिक नीतिका कारण समस्यामा परेको भन्दै उद्योगी व्यवसायीहरू आन्दोलित बनेका हुन् ।

धनुषाको ढल्केवरका उद्योगी व्यवसायीहरूले प्लेकार्ड बोकेर पूर्व–पश्चिम राजमार्गमा प्रदर्शन गरेका थिए । मिथिला उद्योग वाणिज्य संघ, नाडा अटोमोबाइल्स एशोसिएसन अफ नेपाल र जानकी अटोमोबाइल्स एशोसिएसन अफ नेपालको संयुक्त आयोजनामा उनीहरूले सरकार र नेपाल राष्ट्र बैंकविरुद्ध चर्को नाराबाजी गर्दै प्रदर्शन गरेका हुन् ।

प्रदर्शनमा उत्रिएका व्यवसायीहरूले ‘मौद्रिक नीति परिमार्जन गर, चालू पूँजी कर्जा मार्गदर्शन स्थगन गर, व्यवसाय गरी खान देउ, जसले कर तिरेको छ उसलाई पेल्ने र हेप्ने ?, ५० प्रतिशत नगद मार्जिन व्यवस्था गर, बैंकहरुले गरेको बदमासीको सजाय व्यापारीलाई किन ?’ लेखिएको प्लेकार्डहरु बोकेर नाराबाजी गरेका थिए ।

सरकारले उद्योगी व्यवसायीमाथि अत्याचार गरेपछि बाध्य भएर आन्दोलनमा होमिने परेको जानकी अटोमोबाइल्स अफ नेपाल, मधेश प्रदेशको अध्यक्षसमेत रहेका मिथिला उद्योग वाणिज्य संघ ढल्केवरका अध्यक्ष तेजनारायण साहले बताए । व्याजदरमा भएको अस्वाभाविक वृद्धिले उद्योग व्यवसाय नै धराशायी बन्दै गएकाले विरोधमा उत्रिनु परेको जानकारी दिँदै उनले नेपाल राष्ट्र बैंकले मौद्रिक नीति नसच्याएसम्म आफूहरूको चरणबद्ध आन्दोलन जारी रहने बताए ।