शहीद धर्मभक्त राष्ट्रिय प्रत्यारोपण केन्द्र भक्तपुरका वरिष्ठ मिर्गौला विशेषज्ञ डा. कल्पनाकुमारी श्रेष्ठले शिक्षकलाई पढाउँदै आएकी छन् ।

शिक्षकले विद्यार्थी र विद्यार्थीमार्फत घरघरमा जनचेतना पुगोस् भन्ने हेतुले चन्द्रकोट गाउँपालिकाका शिक्षकलाई अंग दानसम्बन्धी जानकारी गराएकी हुन् ।

गाउँपालिकाको बृहत् निःशुल्क स्वास्थ्य शिविरको लागि शान्तिपुरमा आएकी डा. श्रेष्ठले गाउँपालिकाका–१२ विद्यालयका १७ शिक्षकलाई मिर्गौला रोगसँगै अंग दानसम्बन्धी जानकारी दिइन् । उनले मिर्गौलाको निःशुल्क डायलाइसिस र निःशुल्क प्रत्यारोपण हुन्छ भन्ने गाउँगाउँमा जानकारी नभएकाले शिक्षकमार्फत प्रत्येक घरमा जानकारी गराउन आग्रह गरिन् ।

आर्थिक अभावमा मिर्गौलाको उपचार नरोकिने र प्रत्यारोपण गर्न परेमा मिर्गौला दिने र लिने २ व्यक्ति भएमा पुग्ने उनले बताइन् । डा. श्रेष्ठले शरीरका ८ अंग दान गरेर ८ जनालाई संसार देखाउन सकिने बताइन् । रोगले च्यापेर मृत्यु अवस्थामा पुगेपछि अनिवार्य अस्पतालमा पुर्‍याउनुपर्ने जनचेतना पनि गाउँगाउँमा आवश्यक रहेको उनको भनाइ छ । 

मिर्गौला विशेषज्ञ डा. श्रेष्ठले मिर्गौला असफल भएका बिरामी गाउँगाउँमा धेरै रहेको र यसको लक्षण पहिले नै नदेखिने भएकाले समय–समयमा जाँच गर्न पनि शिक्षकले विद्यार्थी र विद्यार्थीले घरमा भनेर सबैलाई सचेत गराउन आवश्यक रहेको बताएका थिए ।

१२ विद्यालयबाट सहभागी शिक्षकले मिर्गौला रोग र अंग दानसम्बन्धी विभिन्न जिज्ञासा राखेका थिए । वरिष्ठ विशेषज्ञ आएको समयमा अप्रत्यक्षरूपमा गाउँगाउँका सचेतनाका लागि सबै शिक्षकलाई त्यससम्बन्धी शिक्षा दिइएको गाउँपालिकाका शिक्षा शाखा प्रमुख नयनसिंह ठकुरीले जानकारी दिए । शिक्षकले विद्यालयमा विद्यार्थीलाई आफूले सिकेको कुरा सिकाउनेछन् ।

चन्द्रकोट गाउँपालिकाका अध्यक्ष युवराज केसीले जनताको स्वास्थ्यप्रति गम्भीर हुँदै गाउँगाउँमा सचेतना होस् भनेर शिक्षकलाई चिकित्सकमार्फत जानकारी गराएको बताएका छन् ।