०६ साउन २०८३, बुधबार
सत्तारुढ दल नेपाली कांग्रेसको केन्द्रीय कार्य सम्पादन समितिको बैठक आज बस्दैछ । अपरान्ह ३ बजे पार्टी केन्द्रीय कार्यालय बीपी स्मृति भवन सानेपामा बस्ने बैठकमा संसदीय दलको निर्वाचनका विषयमा आवश्यक निर्णय लिने बताइएको छ ।
पार्टीका मुख्य सचिव कृष्णप्रसाद पौडेलका अनुसार बैठकमा केन्द्रीय कार्य सम्पादन समितिका पदाधिकारी तथा सदस्यहरुलाई अनिवार्य उपस्थितिका लागि अनुरोध गरिएको छ । बैठकले अधिकारसम्पन्न निर्वाचन समिति गठन गर्ने र त्यसले संसदीय दलको निर्वाचन गराउने जिम्मेवारी पाउने कांग्रेस नेताहरुले बताएका छन् ।
आजको बैठकपछि संसदीय दलको निर्वाचनको मिति पनि तय हुनसक्ने नेताहरुको भनाइ छ । यसअघिसम्म पार्टी सभापति शेरबहादुर देउवाले पुस ३ पछि संसदीय दलको निर्वाचन गर्ने बताउँदैआएका थिए । त्यसको तयारी स्वरुप सभापति देउवाले कांग्रेस सांसदहरुलाई व्यक्तिगत र सामुहिक रुपमा भेटघाट गर्दैआएका छन् ।
संसदीय दलको नेता नै आगामी प्रधानमन्त्रीको उम्मेदवार हुने व्यवस्था भएकाले कांग्रेसमा संसदीय दलको नेता निर्वाचनका लागि चासो रहनेगरेको छ । संसदीय दलको नेतामा सभापति देउवा, महामन्त्री गगन थापा, वरिष्ठ नेता रामचन्द्र पौडेल, नेता डा. शेखर कोइराला लगायतले इच्छा व्यक्त गरेका छन् ।
