०६ साउन २०८३, बुधबार
रुसको रक्षा मन्त्रालयले आफ्नो र चिनियाँ जलसेनाको संयुक्त अभ्यास पूर्वी चीन सागरमा यस साताबाट शुरू हुने जनाएको छ ।
बुधवारदेखि शुरू हुने अभ्यास डिसेम्बर २७ सम्म चल्ने उसले जानकारी दिएको हो । अभ्यासमा रुसी जलसेनाको प्रशान्त बेडा, फ्रिगेट तथा अन्य किसिमका जहाजहरू संलग्न रहनेछन् ।
चीनले अन्य जहाजका अलावा दुईवटा डिस्ट्रोयर पनि पठाउने रुसले जनायो ।
अभ्यासका क्रममा पनडुब्बीप्रतिरोधी युद्ध तथा मिसाइल प्रक्षेपण तालिम पनि संयुक्त रूपमा गरिनेछ ।
एसिया प्रशान्त क्षेत्रमा शान्ति तथा स्थिरता कायम गर्नका लागि दुई सेनाबीचको सहकार्य बलियो बनाउने उद्देश्यले अभ्यास गरिएको रुसको रक्षा मन्त्रालयले बताएको छ ।
चीनले यस अभ्यासका बारेमा टिप्पणी गर्न बाँकी छ ।
