दक्षिण कोरियाबाट ल्याइएको शतप्रतिशत शुद्ध नश्लका गाई नेपालका किसानहरूलाई वितरण गरिएको छ । हेफर इन्टरनेशनल नेपालले कोरियाबाट शतप्रतिशत शुद्ध नश्लका गाई ल्याएर सिन्धुलीको कमलामाई नगरपालिकाका किसानहरूलाई वितरण गरेको हो । 

दक्षिण कोरियाबाट दुई पटक गरेर होलिस्टिन फ्रिजन जातका गाईका ६ वटा बाच्छा र ५७ वटा कोरली गरी ६३ वटा गाई र बहर नेपाल ल्याएर वितरण गरिएको हो । हेफरका अनुसार अझै होलिस्टिन फ्रिजनका २२ वटा कोरली गाई आउने क्रममा रहेको छ । 

हेफर कोरियाबाट प्राप्त गाई पुस ७ गते कोरिया सरकारको तर्फबाट नेपाल सरकारलाई हस्तान्तरण गरिएको थियो । नेपाल सरकारले पुस ९ गते कमलामाईका किसानलाई हस्तान्तरण गरिएको हो । उत्पादनको हिसाबले कोरियाका टप (परीक्षण भएका) २ वटा बहर पनि केही दिनपछि आउने हेफरले बताएको छ । 

नेपालमा पहिलो पटक शुद्ध नश्लका धेरैको संख्यामा गाई आएको हेफरले बताएको छ । हेफर इन्टरनेशनल नेपालका भेटनरी डाक्टर भोला श्रेष्ठले नेपाली स्थानीय गाईलाई नश्ल सुधार गरी संरक्षण गर्ने उद्देश्यले कोरियाबाट गाईहरू ल्याएको बताए । उनले नेपालको स्थानीय गाईको संरक्षण गर्ने काम नेपाल कृषि अनुसन्धान परिषद् पशु सेवा विभागले गरिरहेको बताए । 

श्रेष्ठले नेपालमा रहेको ७३ लाख गाई मध्ये करिब २० प्रतिशत मात्रै गाई उन्नत जातका रहेको जानकारी दिएका छन् । डा.श्रेष्ठले नश्ल सुधारका लागि विदेशबाट गाई ल्याउँदैमा स्थानीय प्रजातिका गाई लोप नहुने बताए । उनले स्थानीय गाई लोप हुन नदिनको लागि राष्ट्रिय पशु प्रजनन तथा आनुवंशिक अनुसन्धान केन्द्र र पशु सेवा विभागले स्थानीय गाईको अनुवंशिक स्रोतहरूको संरक्षण गरी नश्ल सुधारको कामसमेत गरिरहेको बताए । 

उनले नेपालमा दूध उत्पादन बढाउन आवश्यक रहेको भन्दै शुद्ध नश्ल भएका उत्पादन क्षमता बढी भएका गाई ल्याएको बताए । उनले दूधको उत्पादकत्व बढाउन वंशानुगत क्षमता तथा आहारा, स्वास्थ्य र पालनपोषणमा भर पर्ने बताए । उनले कोरियाबाट आएका गाई जेनेटिक रूपमा उच्च उत्पादकत्व भएका बहरलाई न्युक्यलेस हटको रूपमा स्थापना गरेर उत्पादन बढाउने उद्देश्य रहेको बताए । उनले नेपाली गाईपालक किसानहरूलाई उन्नत नश्लको बहरबाट सिमेन उत्पादन गरेर जन्मने बाच्छाहरू राम्रो हुन्छ भन्ने अपेक्षासहित काम गरिने बताए । 

डा. श्रेष्ठले हेफरले कोरियन गाईको हेरचाहको लागि सिन्धुलीमा दक्ष भेटनरी डाक्टर खटाइने जानकारी दिए । उनले कोरियाका जानकारहरू पनि ल्याएर गाईको हेरविचार गरिने बताए । गाईलाई आवश्यक पर्ने शुद्ध नश्लको सिमेन (बीर्य) पनि कोरियाबाटै प्राप्त भएको छ ।