०८ साउन २०८३, शुक्रबार
बिदा हुनुपूर्व सातै प्रदेशका मुख्यमन्त्री सहभागी भएर लुम्बिनी प्रदेशको राजधानी भालुवाङमा हुने भनिएको मुख्यमन्त्री सम्मेलन स्थगित भएको छ ।
पछिल्लो राजनीतिक कारणले मुख्यमन्त्री सम्मेलन स्थगित गर्ने निर्णय भएको लुम्बिनी सरकारका प्रवक्ता तथा आन्तरिक मामिलामन्त्री तिलकराम शर्माले जानकारी दिए ।
हालै कार्यान्वयनमा आएको लुम्बिनी प्रदेशको स्थायी राजधानीमा मुख्यमन्त्री सम्मेलन गर्ने प्रदेश सरकारको तयारी थियो । अन्य प्रदेशका मुख्यमन्त्रीहरूलाई नयाँ राजधानीमा भ्रमण गराउने र गत ५ वर्षे कार्यकालको समीक्षा गर्न सम्मेलन गर्ने भनिए पनि २ दिनअघि स्थगित भएको हो ।
‘राजनीतिक घटनाक्रमले यो सरकारले सम्मेलन गर्न सकेन, अर्को सरकारले गर्ला,’ प्रवक्ता शर्माले लोकान्तरसँग भने ।
लुम्बिनीका मुख्यमन्त्री कूलप्रसाद केसीको प्रस्तावमा हुने भनिएको सम्मेलनमा प्रदेशको ५ वर्षे समीक्षा गर्ने र संघीयता कार्यान्वयनका लागि नयाँ प्रतिनिधि सभालाई सुझाव दिने तयारी थियो । संघीय सरकार बन्दा दलहरूबीचको गठबन्धनको समीकरण परिवर्तन भएको छ ।
नेपाली कांग्रेस र नेकपा माओवादी केन्द्र गठबन्धन गरेर चुनावमा गएको भए पनि एमालेको समर्थनमा माओवादी केन्द्रका अध्यक्ष पुष्पकमल दाहाल ‘प्रचण्ड’ प्रधानमन्त्री बनेका छन् ।
लुम्बिनी प्रदेश सभाका नवनिर्वाचित सांसदहरूको शपथग्रहण कार्यक्रम पुस १६ गते हुने भएको छ ।
सम्मेलनमा मुख्यमन्त्रीहरूले अनुभव आदानप्रदान गर्नुका साथै कार्यसम्पादनका क्रममा संघीय सरकारबाट भएका उल्झनको समाधान खोज्ने, बाझिएका र बन्न नसकेका कानून निर्माणका लागि अबको संसद्लाई सुझाव दिने विषयमा गम्भीर छलफल गर्ने तयारी थियो ।
