०६ साउन २०८३, बुधबार
मन्त्रिपरिषद्लाई पूर्णता दिनेसम्बन्धी सत्तारुढ गठबन्धनको बैठक बालुवाटारमा एक घण्टादेखि जारी छ ।
प्रधानमन्त्री पुष्पकमल दाहाल प्रचण्ड र एमाले अध्यक्ष केपी ओलीबीच भएको सहमतिलाई अन्तिम रूप दिन बैठक बसिरहेको हो ।
बैठकमा प्रधानमन्त्री प्रचण्ड, एमाले अध्यक्ष केपी ओली, राष्ट्रिय स्वतन्त्र पार्टीबाट उपप्रधानमन्त्री एवं गृहमन्त्री रवि लामिछाने, राप्रपाबाट राजेन्द्र लिङ्देन र जसपाबाट उपेन्द्र यादव सहभागी छन् ।
सत्तारुढ दलबीच एमालेले २ राज्यमन्त्रीसहित सबैभन्दा बढी ८ मन्त्रालय पाउनेछ ।
सत्ताको नेतृत्वकर्ता दल माओवादी केन्द्रले ४, राष्ट्रिय स्वतन्त्र पार्टीले ३, राप्रपा र जसपाले २-२ वटा मन्त्रालय पाउने मोटामोटी समझदारी भएको छ ।
लोसपालाई पनि एउटा मन्त्रालय दिएर सरकारमा ल्याउने तयारी भएको बुझिएको छ । सरकारमा सहभागी हुन तयार भएर माधव नेपाल नेतृत्वको नेकपा एकीकृत समाजवादीलाई समेत एक मन्त्रालय दिएर ल्याउने तयारीमा प्रधानमन्त्री प्रचण्ड र ओली लागेको बताइन्छ ।
सबै साना दललाई पनि सरकारमा सहभागी गराउँदा राष्ट्रपति निर्वाचनमा सहज हुने बुझाइ सत्तारुढ दलको छ ।
प्रधानमन्त्रीमा १० पुसमा नियुक्त भएर प्रचण्डले ११ पुसमा सपथ लिएका थिए । शपथ लिएकै दिन उनले अरू तीन मन्त्रीलाई जिम्मेवारी तोकेका थिए । चार मन्त्रीलाई जिम्मेवारी नतोकेका प्रचण्डले २१ दिनपछि बल्ल मन्त्रिपरिषद्लाई पूर्णता दिने तयारी गरेका हुन् ।
सरकारमा सहभागी हुने दलको संख्या धेरै भएपछि संख्या र मन्त्रालयको विषय टुंग्याउन सकस परेको हो ।
